Arwr lleol, Syr Dave Brailsford, yn helpu Deiniolen i 'ffynnu eto'

Mae ymgyrch i droi hen adeilad yng Ngwynedd yn hwb cymunedol wedi cyrraedd y nod, diolch yn bennaf i help arwr lleol.

Y bwriad oedd prynu adeilad yr hen lyfrgell yn Neiniolen a'i droi'n ganolfan gymunedol, gan hefyd adnewyddu'r clwb snwcer drws nesaf.

Gyda Chyngor Gwynedd wedi rhoi amod o £100,000 drwy Gronfa Ffyniant Bro, roedd angen i'r gymuned godi £20,000 i brynu'r adeilad - a hynny erbyn dydd Llun 15 Medi.

Tan yn ddiweddar, roedd hynny'n ymddangos yn heriol. Ond, mae un o enwau mawr y byd seiclo, Syr Dave Brailsford, ag yntau wedi'i fagu yn y pentref, wedi cyfrannu £10,000, gan olygu bod y targed rŵan wedi'i gyrraedd.

Mae Lyndsey Pleming yn edrych ymlaen at gael pobl at ei gilydd a chynnal digwyddiadau yno

Mae Lyndsey Pleming ar bwyllgor pentref Deiniolen ac yn dweud eu bod yn gweithio at gael hwb cymunedol ers blynyddoedd.

"Mae 'na leoliadau bychan o fewn y gymuned, ond dim un digon mawr i gynnal digwyddiadau mwy", meddai.

"Fydd hyn yn golygu bod ganddon ni le ar gyfer digwyddiadau, dod â phobl at ei gilydd ar gyfer eisteddfod ella', gigs ac yn y blaen.

"Petha' sy'n digwydd mewn pentrefi eraill ond yn anffodus s'gen Deiniolen ddim y gofod ar hyn o bryd - ond gyda haelioni pawb, dyma ni."

Yn ôl Lyndsey, roedd hi'n syndod ac yn wefr clywed bod Syr Dave Brailsford wedi bod mor hael.

"Gafon ni'n syfrdanu deud gwir - bod 'na hogyn sy'n teithio'r byd, yn cymysgu efo mawrion y byd chwaraeon, yn dal i gofio ei wreiddiau, yn dal i gofio am ei gymuned," meddai.

"'Da ni 'di gwirioni'n lân. Criw bach ydan ni, 'da ni'n gweithio'n galed ers blynyddoedd i ddod â'r weledigaeth yma'n fyw."

Syr David Brailsford wedi helpu i brynu hen lyfrgell gyda'r bwriad o'i droi'n hwb cymunedol

Mewn datganiad, dywedodd Syr Dave Brailsford CBE: "Mae gen i atgofion hapus o redeg allan o'r Ysgol ar ddiwedd diwrnod a chroesi'r lôn i'r Clwb Snwcer i drio cael y gêm ola' cyn i'r Clwb gau am y prynhawn.

"Dymunaf yn dda i'r pentref yn eu cais i brynu'r hen lyfrgell."

Mae'r efeilliaid lleol Dafydd a Ioan Bean, 20 oed, yn chwarae snwcer yn rheolaidd yno ac yn teimlo'n gryf am sicrhau dyfodol yr adeilad - yn enwedig gan fod gan eu taid, Arthur Owen, gysylltiad agos â'r clwb.

Fe benderfynon nhw gyfrannu rhan o'u cyflogau at yr ymgyrch.

Dywedodd Dafydd: "Dros yr haf 'da ni adre' o coleg a ma' gynnon ni swydd rhan-amser yn McDonalds, a dyma ni'n penderfynu'n gwaith un diwrnod, 'be' 'tasa ni'n rhoi ychydig o bres i'r clwb?'

"Y penderfyniad gorau oedd cyfrannu'r pres o un shifft, sef £100 yr un. Swm bach i gymharu efo'r pris ond mae'n helpu'r clwb i fynd."

Dywedodd yr efeilliaid, Ioan (chwith) a Dafydd fod y ganolfan yn le pwysig iddyn nhw fel teulu

Ychwanegodd Ioan: "Mae'r lle'n bwysig iawn i ni fel teulu achos bod Taid yn arfer chwarae yma - mae ei lun o ar y wal yma.

"Mae 'na lot o wobrau adre', rhyw dair neu bedair gwobr wahanol o ran snwcer a mae ei giw o'n dal adre'.

"'Da ni 'di bod yma'n chwarae ers ryw bedair blwyddyn, tua teirgwaith yr wythnos, felly o'dd o'n bwysig i'r teulu a gwneud yn siŵr bod y lle'n cael ei gadw ar agor a bod rhyw ddefnydd o'r lle."

Er bod y targed wedi'i gyrraedd ar gyfer prynu'r adeilad, bydd y codi arian yn parhau ac unrhyw arian ychwanegol yn mynd at gynnal a chadw'r adeilad.

Ychwanegodd Lyndsey Pleming: "Mae'n gyfnod cyffrous. Adnewyddu, datblygu a gwneud Deiniolen ffynnu unwaith eto."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.