Geraint Davies: Cyd-aelod yn gwneud honiadau yn erbyn AS

Mae Charlotte Nichols (dde) yn honni fod Aelodau Seneddol fel Geraint Davies (chwith) yn teimlo'n "anghyffyrddadwy"

Mae AS Llafur wedi cyhoeddi mai hi yw un o'r menywod sydd wedi gwneud cwyn am aflonyddu rhywiol yn erbyn AS o Gymru.

Dywedodd Charlotte Nichols wrth raglen BBC Panorama fod Geraint Davies wedi rhoi ei law ar ei chanol tra'i bod yn gweithio'n hwyr.

Mae Mr Davies wedi cael ei wahardd gan y Blaid Lafur ers mis Mehefin.

Ms Nichols, yr aelod dros Ogledd Warrington, yw'r achwynydd cyntaf i wneud ei hun yn gyhoeddus.

Dywedodd cyfreithwyr ar ran Mr Davies, yr aelod dros Orllewin Abertawe, ei fod yn gwadu pob honiad yn ei erbyn.

Wedi cael ei rhybuddio amdano

Mae o leiaf pedwar o fenywod eraill wedi gwneud honiadau yn erbyn yr AS, a hynny dros gyfnod o flynyddoedd.

Disgrifiodd Ms Nichols sut y daeth Mr Davies ati tra roedd wrth ymyl peiriant twll yn y wal mewn rhan o San Steffan sydd heb deledu cylch cyfyng.

Dywedodd y Blaid Lafur ei fod wedi ei wahardd o’i waith yn dilyn honiadau “hynod o ddifrifol” o “ymddygiad cwbl annerbyniol”.

Charlotte Nichols: "Roeddwn wedi ei osgoi am y rhan fwyaf o’m mlwyddyn gyntaf yn y Senedd"

Dywedodd Ms Nichols ei bod wedi cael ei rhybuddio cyn iddi gael ei hethol i gadw draw o hyd o 30 o bobl yn San Steffan oherwydd pryderon am aflonyddu rhywiol.

Un o’r ASau cyntaf iddi gael rhybudd amdano wrth ddod i mewn i San Steffan oedd Mr Davies, meddai.

“Roeddwn wedi ei osgoi am y rhan fwyaf o’m mlwyddyn gyntaf yn y Senedd," meddai.

“Un noson ar ôl pleidlais hwyr iawn des i lawr at y peiriant arian i dynnu ychydig o arian parod i gael tacsi adref, ac ar y coridor hwnnw does dim teledu cylch cyfyng.... dydy o ddim yn cael ei ddefnyddio yn helaeth yr adeg hynny o'r nos.

"Felly, roedd hi'n dawel ac fe ddaeth i fyny y tu ôl i mi pan oeddwn i wrth y peiriant arian, rhoi ei law ar gefn fy nghanol a dweud 'Rwy'n falch ein bod yn cael mynd adref nawr'."

Ychwanegodd fod y diwylliant yn San Steffan yn teimlo'n wenwynig ar adegau.

“Os yw pobl yn dianc gyda rhywfaint o’r ymddygiad lefel is yma, mae’r person hwnnw yn dechrau teimlo nad oes modd ei gyffwrdd,” meddai.

Mae Caroline Nokes yn credu bod ymddygiad o'r fath yn weddol eang ar draws y Senedd

Ychwanegodd AS Llafur Caergaint, Rosie Duffield, ei bod hithau wedi cael ei rhybuddio am Mr Davies ar ôl dechrau yn San Steffan.

"Roedd pawb yn y Blaid Lafur yn gwybod am y dyn yma," meddai.

Dywedodd cyfreithwyr ar ran Mr Davies wrth Panorama ei fod yn “llwyr wadu” pob honiad yn ei erbyn ac fe gafodd ei atal gan reolau’r Blaid Lafur rhag gwneud sylw er mwyn osgoi rhagfarnu ymchwiliadau ac unrhyw wrandawiad yn y dyfodol.

Ond mae AS Ceidwadol Romsey a Gogledd Southampton, Caroline Nokes, yn credu bod ymddygiad o'r fath yn weddol eang ar draws y Senedd

"Rwy'n meddwl ei fod yn gyffredin ym mhob plaid," meddai.

"Anaml iawn y mae aflonyddu rhywiol yn ymwneud â rhyw, mae bron bob amser yn ymwneud â phŵer."