Bachgen 18 mis wedi boddi mewn llyn ger Pencader - cwest

Roedd Finley wedi diflannu o olwg ei fam ym mhlasty Maesycrugiau ger Pencader yn Sir Gaerfyrddin

Bu farw babi 18 mis oed drwy foddi mewn llyn ar dir ystâd ei deulu yn Sir Gaerfyrddin, clywodd cwest.

Cafodd Finley Howell Sanders, o Glydach, Abertawe, ei dynnu o'r dŵr 45 munud ar ôl i'w fam alw'r heddlu i ddweud ei fod ar goll ar 26 Mai 2021.

Roedd y bachgen wedi diflannu o olwg ei fam tra’n aros ym mhlasty Maesycrugiau ger Pencader.

Yn ddiweddarach fe wnaeth CCTV ddangos bod Finley wedi cerdded trwy gatiau'r ardd oedd ar agor ar ôl y cŵn, ac wedi cerdded tuag at ardal y pwll.

'Damwain drasig'

Mae'r tŷ Tuduraidd-Gothig mawr a adeiladwyd ar adfeilion castell Elisabethaidd yn 1903 yn adeilad rhestredig gyda saith erw o dir, ac mae bellach yn cael ei ddefnyddio fel gwesty gwely a brecwast moethus.

Clywodd y cwest yn Llanelli bod Finley wedi bod yn aros yng nghartref teulu ei fam a'i bod yn "gyffredin" iddo dreulio amser yn chwarae yn ystafell ei hen nain, Mary.

Ar y diwrnod roedd ei fam, Alexandria Lewis, wedi bod yn helpu ei frawd hynaf, Harry, gyda'i waith cartref ac aeth i orwedd i lawr gan feddwl bod Finley yn chwarae yn ystafell Mary.

Ond clywodd y cwest fod Mary yn meddwl ei fod gyda'i fam.

Pan ddeffrodd Alexandria, aeth i ystafell Mary a darganfod nad oedd yno a dechreuodd y teulu chwilio amdano ym mhobman cyn iddo gael ei ddarganfod mewn llyn.

Clywodd y cwest yn neuadd y dref, Llanelli, bod marwolaeth Finley yn "sydyn ac annisgwyl" ac yn "ddamwain drasig"

Dywedodd Hayley Rogers, swyddog y crwner, bod yr heddlu wedi derbyn galwad gan fenyw ofidus am 22:00 yn dweud nad oedd hi’n gallu dod i hyd i’w mab 18 mis oed.

Ar ôl chwilio o gwmpas yr adeilad a’r tir, am 22:45, daethpwyd o hyd iddo yn ddiymateb yn y llyn.

Ychwanegodd Ms Rogers "er gwaethaf ymdrechion gorau'r gwasanaethau brys" cafodd Finley ei gyhoeddi’n farw ychydig yn ddiweddarach "yn oriau mân y bore canlynol".

Dywedodd Heddlu Dyfed-Powys ei fod yn "farwolaeth sydyn ac annisgwyl" a bod dim i awgrymu fod unrhyw un arall wedi chwarae rhan yn y farwolaeth.

Dywedodd yr uwch grwner dros dro, Paul Bennett, "nad oes unrhyw beth yn fwy trasig na marwolaeth plentyn ifanc" a bod hon yn "ddamwain drasig" oherwydd "cyfres o ddigwyddiadau nad oedd unrhyw un yn bwriadu iddynt ddigwydd".

Cofnododd bod y farwolaeth yn ddamweiniol.