Dirgelwch murluniau 'Banksy' gogledd Cymru

Yn ôl rhai pobl leol, mae murlun y fuwch yn gyfeiriad at farchnad da byw Yr Wyddgrug

Mae pum murlun sy'n cael eu cymharu â gwaith yr artist 'Banksy' wedi ymddangos mewn mannau gwahanol yng ngogledd-ddwyrain Cymru.

Ddechrau'r wythnos fe wnaeth murluniau o fuwch, marchog a thyllan ymddangos ar adeiladau yn Sir Ddinbych a Sir y Fflint o fewn 24 awr i'w gilydd.

Ers i'r darnau o gelf ddod i'r amlwg, mae galwadau wedi bod ar yr awdurdodau lleol i'w gwarchod.

Dywedodd Cyngor Sir Ddinbych wrth y Daily Post nad oes modd iddyn nhw ymyrryd gan fod y gwaith celf ar dir preifat.

Mae rhai yn honni bod y murlun o farchog ar gefn ceffyl yn gyfeiriad posibl at Owain Glyndŵr

Y murlun o fuwch godro oedd y cyntaf i ymddangos - a hynny ar wal hen dafarn 'Derwen' yng nghanol Yr Wyddgrug ddydd Llun.

Erbyn nos Fawrth, roedd adroddiadau bod murlun o dylluan hefyd wedi ymddangos ar ochr arhosfan bws yn Nhrefnant, a murlun o farchog ar gefn ceffyl mewn maes parcio yn Rhuthun.

Y dylluan ar ochr arhosfan bws yn Nhrefnan

Yn ôl rhai pobl leol, mae murlun y fuwch ar wal yn gyfeiriad at farchnad da byw Yr Wyddgrug.

Mae rhai yn credu bod y gwaith celf o farchog ar gefn ceffyl, sydd i'w weld ym maes parcio Crispin's Yard ger Parc Cae Ddol yn Rhuthun, yn gyfeiriad posibl at Owain Glyndŵr.

Mae murlun o blentyn yn gafael ar ymbarél wedi ei beintio ar ymyl y promenâd yn Rhyl

Mae'r artist 'Banksy' yn enwog am ei waith anhysbys sy'n ymddangos mewn gwahanol fannau cyhoeddus, ar hap ar draws y DU.

Fe greodd 'Banksy' gyfres o ddarluniau o anifeiliaid y llynedd o'r enw 'Beastly London', ac mae rhai yn credu mai'r artist byd enwog sydd, o bosib, yn gyfrifol am y murluniau yng ngogledd Cymru.

Nid dyma'r tro cyntaf i furluniau ymddangos yn anhysbys yn yr ardal.

Yn 2024 cafodd colomen, cwningen a phâr o forgrug eu peintio ar adeiladau ac mewn twnnel yn Ninbych.

Er i rai dybio mai 'Banksy' oedd yn gyfrifol, cafodd y gwaith yna ei hawlio gan yr artist DNZ, sy'n wreiddiol o ogledd Cymru ond sydd bellach wedi'i leoli yn Llundain.