Dyn wedi marw ar ôl disgyn o chweched llawr neuadd
- Cyhoeddwyd
Mae myfyriwr 19 oed wedi marw ar ôl disgyn o ffenestr ar chweched llawr un o neuaddau preswyl Prifysgol Abertawe.
Bu farw Matthew Gilbert o'i anafiadau yn Ysbyty Athrofaol Caerdydd ddydd Mercher, 24 Ebrill.
Cafodd ei gludo i'r ysbyty wedi i'r gwasanaethau brys gael eu galw i gampws Singleton y brifysgol yn oriau mân bore Sul, 14 Ebrill.
Mae swyddogion arbenigol Heddlu De Cymru yn rhoi cefnogaeth i'w deulu.
'Myfyriwr hynod addawol'
Dywedodd y brifysgol eu bod "wedi’n syfrdanu a’n tristau yn arw o glywed am farwolaeth Matthew Gilbert".
"Danfonwn ein cydymdeimlad dwysaf i’w deulu yn eu galar.
"Roedd Matthew yn fyfyriwr blwyddyn gyntaf hynod addawol a oedd yn astudio LLB y Gyfraith gyda Throseddeg.
"Bydd colled fawr ar ei ôl, ymysg ei gyfeillion a’i gydnabod.
"Rydym yn cynnig cefnogaeth i fyfyrwyr a staff yn ystod y cyfnod heriol hwn."
“Dyw e ddim yn teimlo’n real," meddai Mia Brown
Mae Mia Brown, 19, yn byw yn y fflat lle wnaeth Matthew Gilbert gwympo, ond doedd hi ddim wedi cwrdd â’r myfyriwr.
“Mae’n iasol,” dywedodd. “Dyw e ddim yn teimlo’n real.
“Mae pawb yn siarad amdano - rhywbeth mor anghyffredin. Doeddwn i byth yn disgwyl i hyn ddigwydd.
“Ry’n ni wedi cael cefnogaeth achos fe ddaeth rhai o hyd iddo, roedd pobl yn ei adnabod, rhai yn yr un darlithoedd â fe.
“Ro’n i’n gobeithio y byddai’n goroesi. Mae’n ofnadwy.”