Negeseuon llawn rhegfeydd honedig gan gyn-uwch swyddog S4C yn rhan o ddogfennau llys

Mae Llinos Griffin-Williams yn gwadu honiadau o gamymddwyn difrifol

Mae negeseuon testun llawn rhegfeydd a gafodd eu hanfon yn honedig gan gyn-uwch swyddog S4C sydd yn ceisio hawlio dros £500,000 gan y darlledwr wedi dod i'r amlwg mewn dogfennaeth o'r Uchel Lys.

Mae cyfres o ddogfennau hirfaith wedi eu rhannu gyda Newyddion S4C yn ymwneud â hawliad gan gyn-brif swyddog cynnwys S4C, Llinos Griffin Williams, sydd yn dwyn achos yn erbyn ei chyn-gyflogwr a'r cyn-gadeirydd Rhodri Williams.

Cafodd Llinos Griffin-Williams ei diswyddo wedi honiadau iddi ymosod yn eiriol ar gyn-fewnwr Cymru Mike Phillips tra'n feddw wedi gêm Cymru yn erbyn Georgia yng Nghwpan Rygbi'r Byd yn Nantes.

Mae Ms Griffin-Williams yn gwadu camymddwyn difrifol ac yn ceisio hawlio iawndal ar sail diogelu data. Mae hefyd yn cyhuddo Rhodri Williams o gamweithredu mewn swydd gyhoeddus.

Mae S4C a Rhodri Williams yn gwadu'r cyhuddiadau yn eu herbyn, ac yn dweud i Ms Griffin-Williams gael ei diswyddo am gamymddwyn difrifol.

Yn ôl dogfennau sydd wedi eu hanfon at yr Uchel Lys ar ran y diffynyddion, fe wnaeth tri unigolyn sydd yn gweithio o fewn i'r byd darlledu Cymreig gysylltu â Rhodri Williams i gwyno am ymddygiad honedig Ms Griffin-Williams yn Nantes.

Y tri hynny oedd cadeirydd gweithredol cwmni Tinopolis Ron Jones, cyfarwyddwr gweithredol Whisper Cymru Carys Owens, sydd yn wraig i gyn-gapten Cymru Ken Owens, a thrydydd unigolyn oedd yn gweithio i S4C ar y pryd ond na allwn ni ei enwi.

Negeseuon wedi eu 'gorliwio'

Yn y dogfennau, mae S4C a Rhodri Williams yn honni bod Ms Griffin-Williams wedi anfon negeseuon at Carys Owens a oedd yn cynnwys iaith gref eithriadol.

Mae darnau o'r negeseuon sy'n cael eu dyfynnu yn y dogfennau yn honni bod Ms Griffin-Williams wedi dweud wrth Ms Owens bod "Sian" yn flin iawn gyda hi - mae'r negeseuon, honnir, yn cynnwys rhegfeydd nad ydynt yn cael eu hailadrodd yma gan y BBC.

Honnir hefyd bod y negeseuon yn dangos iddi ddefnyddio rhegfeydd mewn neges a oedd yn mynnu bod Ms Owens yn cael y "talent yma" ac yn dweud wrth Ms Owens nad oes neb yn poeni am y criw.

"Mae angen i chi ddod â'r talent yma. Mae hi eisiau'r talent."

Dywedodd Ms Griffin-Williams fod y negeseuon testun sydd wedi'u dyfynnu wedi'u "gorliwio" ac nad oeddent yn negeseuon oedd yn "bwlio nac yn ymosodol".

Dywedodd S4C na fyddai'n addas iddyn nhw wneud sylw ar achos cyfreithiol cyfredol

Mae honiad iddi hefyd ddweud wrth un o uwch-gynhyrchwyr Whisper Cymru na fyddai'r cwmni yn cael gwaith pellach gan S4C am y 12 mis nesaf.

Mae'r dogfennau ar ran Llinos Griffin-Williams yn dweud bod hynny yn "anwiredd."

Mae Ms Griffin-Williams yn ceisio hawlio £565,000 am golledion ariannol a symiau sydd heb eu pennu eto am niwed i'w henw da a niwed i'w hiechyd a'i theimladau.

Dywedodd S4C na fyddai'n addas iddyn nhw wneud sylw ar achos cyfreithiol cyfredol.

Doedd Rhodri Williams ddim am ychwanegu at yr hyn sydd yn y ddogfennaeth ar ei ran yn y llys.

Mae'r achos yn yr Uchel Lys yn parhau.

Mae gohebydd y BBC, Gwyn Loader yn ogystal â Martin Shipton o Nation.Cymru yn cael eu henwi yn nogfennau'r achos fel newyddiadurwyr sydd wedi dilyn a gohebu ar y stori.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.