Arestio pedwar mewn ymchwiliad i staff Carchar y Parc

Mae pedwar o bobl wedi cael eu harestio ar amheuaeth o ymosod a chamymddwyn mewn swydd gyhoeddus ar ôl i bryderon gael eu codi am "gyfres o ddigwyddiadau" yng Ngharchar y Parc.

Dywedodd Heddlu De Cymru fod dynes 23 oed o Ben-y-bont ar Ogwr, dyn 25 oed o Ferthyr Tudful, dyn 35 oed o Lanelli a dyn 45 oed o Bontycymer wedi cael eu harestio.

Dywedodd y Ditectif Brif Arolygydd Dean Taylor: "Cawsom bryderon am ymddygiad staff yng Ngharchar y Parc ddydd Mercher 18 Medi.

"Mae swyddogion yng nghamau cynnar yr ymchwiliad ac yn gweithio'n agos gyda G4S [sy'n rheoli'r carchar] tra bod ymchwiliadau'n parhau."

'Mwyafrif ein staff yn onest'

Dywedodd llefarydd ar ran Carchar y Parc fod “mae mwyafrif helaeth ein staff yn weithgar ac yn onest".

"Rydym yn gwbl ymroddedig i gael gwared ar unrhyw ddrwgweithredu.

“Rydym yn cymryd yr honiadau hyn o ddifrif ac yn cefnogi’r heddlu’n llawn gyda’u hymchwiliad.”