Plaid Brexit ddim am herio seddi'r Blaid Geidwadol

Nigel Farage yn siarad ddydd LlunGetty Images

Roedd Nigel Farage yn siarad yn Hartlepool ddydd Llun

Mae Plaid Brexit wedi cadarnhau y byddan nhw'n sefyll mewn 32 allan o 40 etholaeth yng Nghymru yn yr etholiad cyffredinol.

Mae'r blaid wedi dweud na fyddan nhw'n rhoi ymgeiswyr ymlaen yn yr wyth sedd gafodd eu hennill gan y Ceidwadwyr yng Nghymru yn etholiad 2017.

Golygai hyn na fyddan nhw'n sefyll ym Mrycheiniog a Sir Faesyfed, gafodd ei hennill gan y Ceidwadwyr ddwy flynedd yn ôl, ond gafodd ei hennill mewn isetholiad eleni gan y Democratiaid Rhyddfrydol.

Dywedodd arweinydd y blaid, Nigel Farage y byddai "sefyll ble mae seddi Ceidwadol eisoes yn bodoli yn cynyddu'r siawns am refferendwm arall ar Ewrop".

Golygai hyn na fydd Plaid Brexit yn sefyll yn:

  • Aberconwy

  • Brycheiniog a Sir Faesyfed

  • Gorllewin Caerfyrddin a De Penfro

  • Gorllewin Clwyd

  • Mynwy

  • Sir Drefaldwyn

  • Preseli Penfro

  • Bro Morgannwg

Getty Images

Mae Nathan Gill (dde) wedi cefnogi penderfyniad Nigel Farage i beidio â sefyll yn yr etholiad

Roedd Mr Farage wedi datgan yn gynharach ei fod yn bwriadu sefyll mewn mwy na 600 etholaeth ar hyd y DU.

Dywedodd wrth BBC Cymru ddydd Gwener y byddai ymgeisydd Plaid Brexit yn sefyll ymhob etholaeth yng Nghymru.

Dywedodd aelod blaenllaw o Blaid Brexit, yr Aelod o Senedd Ewrop, Nathan Gill: "Rydym wedi bod yn hael iawn.

"Roedd yn benderfyniad anodd, ond rydym wedi camu fewn i gynghrair. Rydym yn hyderus iawn wrth gamu fewn i'r etholiad yma yng Nghymru," meddai.

Mae Mr Farage wedi dweud ei fod yn dymuno canolbwyntio ar gymryd seddi oddi ar y Blaid Lafur.

"Ar un ystyr mae gennym gynghrair Gadael bellach, ond mae'n un unochrog," meddai.

"Rydyn ni wedi penderfynu bod yn rhaid i ni roi gwlad o flaen plaid a mynd â'r frwydr i Lafur."

Straeon perthnasol