Mì-chinnt mu dè nì a' choimhearsnachd mu reic Oighreachd Cheann a Deas Shlèite

Nochd cha mhòr 150 duine aig coinneimh phoblach ann an Slèite oidhche Luain a bhruidhinn mun t-slighe a ghabhas luchd-còmhnaidh mu Oighreachd Cheann a Deas Shlèite, a tha air a' mhargaidh an-dràsta.

Thàinig an naidheachd bho chionn cola-deug gun robh Urras Fearann Chlann Dòmhnaill gu bhith a' reic a' chuid as motha den talamh a bhuineas dhaibh mar chlach às an adhair dhan choimhearsnachd.

Dh'innis a' bhuidheann chathrannais, a ghabh smachd air an oighreachd bho chionn còrr agus 50 bliadhna, gun tèid Caisteal Armadail agus Ionad Chlann Dòmhnail agus togalaichean agus fearann eile air a' mhargaidh tràth as t-samhradh.

Dh'iarr muinntir na sgìre gun tèid dàil a chur air an reic gus am biodh cothrom aca beachdachadh air a' ghnothach.

Tha an oighreachd air a' mhargaidh air prìs faisg air £6.8m.

Bha deasbad aig coinneamh na h-oidhche raoir air am bu chòir dhaibh feuchainn ri cuid den talamh neo togalaichean a cheannach.

Thuirt an Dtr Andy Williamson, Cathraiche Comhairle Coimhearsnachd Shlèite, nach eil cuis taice ann airson an oighreachd air fad sa bheil 20,000 acaire a cheannach.

"Tha sinn ag aithneachadh cho cudromach 's a tha e gum bi an roghainn sin aig na croitearan agus chan eil sinn airson an sàrachadh," thuirt e.

Chuala a' choinneamh gun cosgadh e suas ri £5m not Caisteal Armadail a chàradh.

Tha Flòraidh NicIlleathain, a tha a' fuireach ann an Tarsgabhaig, a' smaoineachadh "airson Ionad Chlann Dòmhnaill fhèin gum biodh sin na b' fheàrr dhuinn na an oighreachd uile gu lèir".

Tha Iain MacFhionghain, à Camas Cros, ag ràdh gu bheil iad "a' cumail dorsan fosgailte".

Thuirt e: "Feumaidh sinn a bhith a' smaoineachadh air na cothroman a tha a' nochdadh air fad."