Coimisean an Fhearainn a' càineadh Urras Fearainn Chlann Dòmhnaill

Tha mì-thoileachas ann an Slèite nach deach bruidhinn ris a' choimhearsnachd an toiseach is chaidh fianais a thogail air an deireadh-sheachdain

Tha Coimisean Fearainn na h-Alba air càineadh a dhèanamh air Urras Fearainn Chlann Dòmhnaill agus mar a tha iad air an oighreachd aca san Eilean Sgitheanach a chur air a' mhargaidh.

Thathas ag iarraidh còrr air £6.8m airson na h-oighreachd.

Tha mì-thoileachas air a bhith san sgìre nach deach bruidhinn ris a' choimhearsnachd an toiseach.

Dh'iarr a' bhuidheann Fearann Coimhearsnachd na h-Alba mar-thà gun deadh dàil a chur air reic na h-oighreachd gus cothrom beachdachaidh a thoirt don choimhearsnachd.

Ann am brath a sgaoil iad, tha Coimisean Fearainn na h-Alba, a bhios a' comhairleachadh Riaghaltas na h-Alba air cùisean fearainn, a-nise ag ràdh gum bu chòir conaltradh fosgailte a bhith ann ann an suidheachadh mar seo.

"Nuair a thèid oighreachdan mòra fearainn a reic, bhrosnaicheamaid an fheadhainn a tha ga reic bruidhinn gu dìreach ri coimhearsnachdan ionadail mus dèan iad sin.

"Ged nach eil dleastanas fon lagh gun tachair sin aig an àm seo, bu chòir coimhead ris mar chleachdadh reusanta.

"Bheir e cothrom do choimhearsnachdan tuigse a bhith aca air na dh'fhaodadh an reic a bhith a' ciallachadh dhan sgìre, beachdachadh air an oighreachd no pàirt dhith a cheannach dhaibh fhèin, no beachdan a chur an cèill a ghabhas a chur an lùib an reic.

"Chan eil seo air tachairt sa chùis seo, a' fàgail gu bheil tighinn air buidhnean coimhearsnachd freagairt a thoirt air an t-suidheachadh gu luath, gun an ùine no am fiosrachadh a b' fheàrr a bhiodh aca".

Bidh coinneamh aig Comhairle Coimhearsnachd Shlèite mun chùis oidhche Mhàirt.

Tha Coimisean an Fhearainn ag ràdh gu bheil e deatamach gum faigh a' choimhearsnachd ùine is cothrom an gnothach a dheasbad ceart.

"Le cho cudromach 's a tha am fearann seo, agus cho cudromach 's a tha uachdranas an fhearainn, dh'iarramaid air an luchd-reic ùine gu leòr a thoirt a bhruidhinn ris a' choimhearsnachd agus leigeil leotha rannsachadh ceart a dhèanamh air na roghainnean a th' aca", thuirt iad.

Bile ùr

Fo Bhile ùr Ath-leasachaidh an Fhearainn a tha a' dol tro Phàrlamaid na h-Alba an-dràsta, bhiodh dleastanas laghail ann innse don choimhearsnachd mus cuirear oighreachd os cionn 3,000 heactair air a' mhargaidh.

Tha oidhirpean a' dol a' bhile sin a neartachadh.

Ach tha cathraiche Coimisean Fearainn na h-Alba, Mìcheal Ruiseal, ag ràdh gu bheil feum air dàil air reic an fhearainn ann an Slèite co-dhiù.

"Cha chreid mi gum biodh mì-bhuannachd mhòr ann do dhuine sam bith maill a chur air a' phròiseas seo," thuirt e.

"Tha e gu mòr a chùm buannachd na coimhearsnachd - agus theirinnsa cuideachd do dh'Urras Fearainn Chlann Dòmhnaill - seo a dhèanamh san dòigh as fheàrr as urrainn.

"Tha croitearachd a' dol air an oighreachd agus theirinn gum biodh mòran den bheachd gum biodh e ciallach nam biodh sin fo shealbh ionadail.

"Ach 's e am prionnsabal san fharsainneachd an seo, nuair a thèid pìos fearainn den mheud seo a chur air a' mhargaidh, tha e cudromach gum bi guth aig a h-uile duine a tha an sàs san fhearann sin a thaobh na thachras dha."

Chaidh beachd iarraidh bho Urras Fearann Chlann Dòmhnaill.