57% de chloinn P1 sna h-Eileanan Siar ann am FtMG

Tha Dòmhnall MacLeòid ag ràdh gu bheil a bhuil aig poileasaidh ùr "Gaelic First" na Comhairle, ach gum feumar oidhirp a dhèanamh le pàrantan a h-uile bliadhna

Tha 57% de chloinn P1 ann an sgoiltean nan Eilean Siar a' dol tro fhoghlam Gàidhlig - sin an ceudad (%) as motha gu ruige seo.

Tha seo às dèidh dha na h-àireamhan tuiteam gu 42% ann an 2024, an ìre as ìsle bho thug Comhairle nan Eilean Siar poileasaidh ùr a-steach ann an 2020.

Fon phoileasaidh sin feumaidh pàrantan taghadh gun a dhol taobh na Gàidhlig.

"Rinn sinn obair mhòr an-uiridh ag obair còmhla ri pàrantan agus a' choimhearsnachd airson taic a thoirt airson taghadh Gàidhlig agus tha sinn a' faicinn a-nis gu bheil na h-àireamhan a' tighinn troimhe leis an obair a bha sin," thuirt Ceannard an Fhoghlaim aig Comhairle nan Eilean Siar, Dòmhnall MacLeòid.

"Tha sin thairis air na h-eileanan air fad a tha sinn a' faicinn sin a' fàs."

Tha Mgr MacLeòid ag ràdh gu bheil am poileasaidh a thàinig a-steach ann an 2020 a' toirt buaidh air cùisean.

Thuirt e ge-tà, gu bheil feum air oidhirp a h-uile bliadhna dha aindeoin.

"Tha sin a' toirt adhbhair dha pàrantan a bhith a' taghadh Gàidhlig, ach fiù 's bhon uair sin tha sinn an dèis a bhith a' faicinn uaireannan nan àireamhan ag èirigh, 's uaireannan na h-àireamhan a' tuiteam," thuirt e.

"Agus an leasan dhuinn fhìn an seo, feumaidh sinn a bhith ag obair a h-uile bliadhna le pàrantan. Chan urrainn dhuinn dìreach a bhith a' cleachdadh a' phoileasaidh 's a' sùileachadh gu bheil a h-uile càil a-nis freagarrach 's gum bi e rèidh."

Tha dragh ann fhathast ge-tà, mun chrìonadh san àireimh de sgoilearan san fharsaingeachd.

Bha an àireamh a chaidh a-steach gu P1 eadar Beurla is Gàidhlig 30% nas lugha na an àireamh a chaidh air adhart dhan àrd-sgoil.

"Thairis air na bliadhnaichean, 's mathaid na bliadhnaichean bhon phandemic, tha sinn gu h-àraid air faicinn gu bheil àireamhan a' clàradh sgoile a' tuiteam thairis air Gàidhlig is Beurla", thuirt e.

"Tha sinn toilichte a' faicinn gu bheil na h-àireamhan Gàidhlig am measg sin ag èirigh.

Tha e ag ràdh gur e "adhbhar rannsachaidh is sgrùdaidh" don ùghdarras ionadail gu bheil na tha "de theaghlaichean a' fuireach anns na coimhearsnachdan, na h-àireamhan a tha a' clàradh sgoile, thairis air na bliadhnaichean a' tuiteam".