A bhith aig a' Mhòd "an obair as tlachdmhoire a th' ann"

Tha Seumas Greumach a' fàgail A' Chomuinn airson obair a ghabhail òs làimh le Bòrd na Gàidhlig

Tha Mòd Loch Abair cha mhòr seachad agus tha linn ùr ron Chomunn Ghàidhealach ris a bheil prìomh fhèis na Gàidhlig an urra.

Tha Seumas Greumach air a bhith aig an stiùir airson faisg air sia bliadhna ach tha e a' falbh airson dreuchd ùr le Bòrd na Gàidhlig.

Tha Seumas ag ràdh gur e a bhith aig a' Mhòd fhèin "an obair as tlachdmhoire" dha.

Chan eil ach sianar sa sgioba agus 's e an obair as motha aca tron bhliadhna airgead gu leòr fhaighinn airson an ath-mhòid.

"Cho luath 's a tha aon mhòd seachad tha thu a' tòiseachadh às ùr a' lorg maoineachaidh gu leòr airson buidseat an tachartais a chur air dòigh," mhìnich Seumas agus e a' bruidhinn ri Dòmhnall Moireasdan air Aithris na Maidne.

Tha am Mòd a' faighinn maoineachaidh bho bhuidhnean poblach agus bhon ùghdarras ionadail sa sgìre far a bheil e ga chumail, ach tha Seumas ag ràdh gum feum iad a dhol a-steach don roinn phrìobhaidich airson "buidseat slàn seasmhach a chur air dòigh".

Còmhla ris bha Peigi NicIllinnein a bhios a' gabhail àite Sheumais mar àrd-oifigear A' Chomuinn Ghàidhealaich.

Thuirt i: "Tha dùbhlan romham agus 's e urram mòr a th' ann a bhith a' togail air an obair a tha Seumas air a dhèanamh."

A bharrachd air airgead a thogail fad na bhliadhna, tha uallach air an sgioba còrr is 200 farpais agus faisg air 100 tachartas air iomall a' Mhòid a lìbhrigeadh.

Rinn i moladh air cho math 's a tha An Gearasdan airson a' Mhòid.

"Tha mi a' smaoineachadh gur e coimhearsnachd gu math Gàidhealach a th' ann agus tha daoine a' dol a-mach gu tachartasan agus gu na farpaisean agus tha sin a' toirt togail dhomh," thuirt i.

Tha Peigi NicIllinnein air obair Sheumais Ghreumaich a ghabhail thairis mar àrd-oifigear A' Chomuinn Ghàidhealaich

'S e adhbhar misneachd a th' ann don Chomunn cuideachd gu bheil an ìre de thàlant am measg nan seinneadairean òga cho àrd.

Bha buannachd na h-iomairt a thòisich iad ann an 2020 airson an òigridh a bhrosnachadh follaiseach am-bliadhna a rèir Sheumais.

"Chaidh còrr is 200 sgoilear air adhart dhan Mhòd Nàiseanta mar thoradh air Acadamaidh a' Mhòid," thuirt e.

'S e an dùbhlan a-nis barrachd inbheach a bhrosnachadh - na fir gu h-àraid - cur a-steach airson farpais seinn Bonn Òir a' Chomuinn.

'S dòcha gum faicear buil na h-obrach sin aig a' Mhòd Nàiseanta Rìoghail an ath-bhliadhna a bhios ann an Glaschu.