Muinntir Dhùn Bheagain "a' faicinn rudan a' gluasad san dòigh a tha sinn ag iarraidh"

Tha muinntir Dhùn Bheagain a' dèanamh gàirdeachais is Comhairle na Gàidhealtachd air maoineachadh is clàr-ama aontachadh 'son bun-sgoil ùr a thogail sa bhaile.

Thathas an dòchas gun tòisich obair-togail an ath-bhliadhna is gum fosgail an sgoil ann an 2027.

Bha an leasachadh am measg grunn phròiseactan a thaobh sgoiltean ùra a thogail no sgoiltean a th' ann a leasachadh a fhuair cead bho chomhairlichean Diardaoin.

Tha an t-airgead - cha mhòr £400m - a' tighinn bho Phlana In-ionmhais na Gàidhealtachd.

Thèid cuideachd dachaighean ùra a thogail 'son Acadamaidh Bhaile Theàrlaich is Bun-sgoil na Manachainn, le sgoiltean ùra cuideachd ann an Inbhir Theòrsa is leasachaidhean mòra do dh'Acadamaidh na Cànanaich is Àrd-sgoil Inbhir Nis.

Thèid co-chomhairle a dhèanamh air moladh gus dà sgoil a thogail air aon làraich ann an Inbhir Pheofharain.

Tha na h-uimhir de chonnspaid ann mun sin mar-thà is pàrantan Sgoil an Naoimh Cliaman air a bhith ag iomairt fad bhliadhnaichean 'son sgoil ùr is dùil aca gum biodh e air làrach fa leth.

Thuirt fear-gairm na Comhairle, Bill Lobban, gur e "là air leth cudromach" a bh' ann is gum bi muinntir na Gàidhealtachd taingeil do chomhairlichean 'son na planaichean a chur troimhe.

Ann an Dùn Bheagain 's e ceum mòr a tha seo is pàrantan is muinntir na coimhearsnachd air a bhith a' strì bho chionn fhada gus sgoil ùr fhaighinn.

Chualas cho fada air ais ri 2018 mu uisge is fuachd san sgoil is fiù 's rodain mu sgaoil aig an làraich.

B' e buille mhòr a bh' ann an 2023 nuair a bha sgoil ùr ann an Dùn Bheagain am measg phròiseactan a bha san amharc aig Comhairle na Gàidhealtachd ach nach deach air adhart ri linn dìth ionmhais.

"Tha am baile air a bhith gu math sàmhach is daoine ag ràdh gu bheil sinn air a bhith air ar dìochuimhneachadh," thuirt Emma Sìne Mhoireasdan bho Urras Coimhearsneachd Dhùn Bheagain.

"Ach tha sinn a-nise a' faicinn rudan a' tachairt. Fhuair sinn pàirc ùr is iad a-nise a' bruidhinn air an sgoil ùr a thòiseachadh.

"Tha e a' toirt misneachd tha mi a' smaoineachadh is brosnachadh ùr airson daoine a tha 's dòcha 'son tilleadh air ais dhan sgìre is teaghlach a thogail ann.

"Tha rudan math gu bhith againn airson clann a thogail, àite 'son spòrs agus daoine a bhith còmhla is àite 'son fuireach."

Cosgaidh an sgoil ùr ann an Dùn Bheagain £18m is Comhairle na Gàidhealtachd an dòchas gum fosgail e 'son bliadhna-sgoile 2017/18.

Thuirt ceannard an foghlaim, an comh Sgitheanach Iain MacFhionnlaigh, gu bheil e glè mhisneachail gun tèid cumail ris a' chlàr-ama.

"Tha e cho cudromach a thaobh slàinte, dìreach àite sona a bhith ag ionnsachadh," thuirt Emma Sìne Mhoireasdan.

"Nì sin a a h-uile feum dhan chloinn," thuirt i.

A thuilleadh air an sgoil, tha planaichean nas fharsaing ann gus taighean ùra is goireasan spòrs a thogail ann an Dùn Bheagain cuideachd.

Tha na planaichean sin fa leth bho mhaoineachadh na sgoile a bhathar a' deasbad Diardaoin, ach tha Emma Sìne ag ràdh gu bheil iad cuideachd deatamach.

Tha Urras Coimhearsneachd Dhùn Bheagain iad fhèin ag obair còmhla ri Comhairle na Gàidhealtachd is Sgioba Ball-coise Iar-Thuath an Eilein Sgitheanaich a thaobh nan goireasan spòrs.

Gheibh iad misneachd, tha fios, bhon naidheachd Diardaoin mu ghoireasan ùra spòrs a bhios an cois an leasachaidh airson bun-sgoil ùr a thogail san Àth Leathann.

Tha an t-Urras cuideachd air a bhith a' dèanamh sgrùdaidh air an iarrtas air taighean ùra san sgìre.

Tha cead planaidh aig Buidheann Taigheadais Loch Aillse agus an Eilein Sgitheanaich airson sia taigh deug a thogail ri taobh far am bi an sgoil ùr. Tha rathad ùr chun na làraich sin agus chun na sgoile ùire cha mhòr deiseil

"Chan eil taighean a bhith air an togail ann an Dùn Bheagain leis a' Chomhairle 'son ùine mhòr," thuirt Emma Sìne.

"Tha sinn ag iarraidh gun till daoine òga dhan eilean is sin a' chiad rud, taighean a bhith aca as urrainn dhaibh fhaighinn air màl, tha sin gu math cudromach airson na sgìre agus 'son na sgoile fhèin."

Eadar dearbhadh air maoineachadh is clàr-ama na sgoile is dòchas mu thaigheadas is goireasan spòrs, tha Emma Sìne ag ràdh gu bheil a-nise misneachd às ùr ann am measg mhuinntir Dhùn Bheagain.

"Airson ùine mhòr tha tòrr strì air a bhith ann is argamaid ach a-nise tha sinn a' faicinn rudan a' gluasad san dòigh a tha sinn ag iarraidh.

"Tha e dìreach math 'son na sgìre air fad is tha a h-uile duine a' coimhead air adhart ri seo."