Dùil ri maoineachadh 'son sgoil ùr an Dùn Bheagain

Planaichean Sgoil Dhùn Bheagain

Thèid iarraidh air Comhairle na Gàidhealtachd Diardaoin maoineachadh is clàr-ama aontachadh 'son bun-sgoil ùr a thogail ann an Dùn Bheagain a dh'fhosgladh ann an 2027.

Tha seo am measg phròiseactan gus sgoiltean ùra a thogail no sgoiltean a th' ann a leasachadh a bhios comhairlichean a' deasbad is planaichean luach cha mhòr £400m air am beulaibh.

Nam measg cuideachd tha Acadamaidh Bhaile Theàrlaich ann an Inbhir Nis.

Tha mì-thoileachas air a bhith ann fad bhliadhnaichean mu staid Bun-sgoil Dhùn Bheagain.

Rinn pàrantan gearanan cho fada air ais ri 2018 mu dhampachd san sgoil is uisge a' taomadh a-steach dhan togalach.

Thuirt iad fiù 's gun robh rodain aig an làraich.

Ach ged a thuirt Comhairle na Gàidhealtachd aig an àm gun robh sgoil ùr ann an Dùn Bheagain mar aon de na prìomhachasan maoineachaidh aca, cha tàinig adhartas.

Bha briseadh-dùil eile ann an 2023 nuair a dh'aontaich an t-ùghdarras ionadail prògram calpa ùr is sgoil ùr ann an Dùn Bheagain am measg phròiseactan a bha san amharc bho thùs nach deach air adhart ri linn dìth ionmhais.

Thuirt pàrantan Dhùn Bheagain aig an àm gun deach clann na sgìre a thrèigsinn.

Thàinig dòchas às ùr ann an 2024 nuair a dh'fhoillsich Comhairle na Gàidhealtachd plana gus maoin ùr £2bn a chruthachadh le fòcas air sgoiltean is rathaidean gu h-àraid.

Bha sin às dèidh do dhraghan nochdadh mu staid sgoiltean na sgìre san fharsaingeachd.

Tha 2% de dh'àrdadachadh 7% a chuir Comhairle na Gàidhealtachd air a' chìs-chomhairle a' dol gu Plana In-ionmhais na Gàidhealtachd.

'S ann às a' mhaoin a thig airgead airson nan sgoiltean a tha fon phrosbaig aig comhairlichean Diardaoin.

Fo na planaichean a th' ann a thaobh Dhùn Bheagain bhiodh obair togail a' tòiseachadh an ath-bhliadhna le dùil gum fosgladh sgoil ùr 'son bliadhna-sgoile 2027/28.

Chosgadh an leasachadh £18m.

Thathas ag amas air 2027/28 cuideachd 'son Bun-sgoil ùr na Manachainn, 2029/30 'son nan leasachaidhean a thaobh Acadamaidh Bhaile Theàrlaich, Acadamaidh na Cananaich, agus Àrd-sgoil Inbhir Nis, is 2030 'son sgoil ùr is goireasan coimhearsnachd eile ann an Inbhir Theòrsa.

"Mu dheireadh thall tha sinn ann an suidheachadh clàran-ama a stèidheachadh airson nam pròiseactan seo," thuirt ceannard Comataidh an Fhoghlaim, an Comh. Iain MacFhionnlaigh.

"Thèid na pròiseactan seo air adhart is tha mi glè mhisneachail gun tèid cumail ris na clàran-ama.

Planaichean Sgoil Dhùn Bheagain

"'S e dòigh maoineachaidh ùr is diofraichte a tha seo is tha mi a' smaointinn gu bheil e adhartach is cruthachail is gum faic coimhearsnachdan diofar mòr a thaobh sgoiltean anns na bliadhnaichean ri thighinn."

Tha planaichean ann an Dùn Bheagain cuideachd 'son taighean ùra is goireasan spòrs a thuilleadh air an sgoil, ged nach eil seo fon phrosbaig Diardaoin.

Thèid iarraidh air comhairlichean aig a' choinneimh cuideachd gluasad air adhart le co-chomhairle air moladh gus dà sgoil a thogail air aon làraich ann an Inbhir Pheofharain.

Tha cuid de phàrantan Sgoil an Naoimh Cliaman air dragh a thogail mu na molaidhean sin.