Gàrradh Àranais ag amas air luchd-obrach a dhùblachadh

Thathar ag amas air 300 duine fhastadh aig Gàrradh Àranais taobh a-staigh an ath dhà bhliadhna

Tha Gàrradh Àranais ann an Leòdhas an dòchas gum bi obair gu leòr aca airson 300 duine ma thèid aca air cùmhnantan niùclasach, ola, gas agus cumhachd ath-nuadhachail fhaighinn.

'S e Navantia a tha a' ruith na làraich a-nis an dèidh do Harland & Wolff a dhol ann ann an rianachd an-uiridh.

Bha a' chompanaidh, leis an riaghaltas Spàinneach, air gealltainn obair-leasachaidh a dhèanamh aig na gàrraidhean Albannach aca.

Tha manadsair Àranais, Albert Allan, ag ràdh gu bheil an t-airgead a tha Navantia a' cur a-steach don ghàrradh agus na goireasan a th' aca mar-thà air leigeil leotha seo a dhèanamh.

Tha Manaidsear Gàrradh Àranais, Albert Allan, ag ràdh gu bheil adhbhar aca airson a bhith misneachail mun àm ri teachd

Tha a-nis barrachd air 165 luchd-obrach làn-ùine aig a' ghàrradh air iomall Steòrnabhaigh.

Ghabh Mgr Allan ris gur e dùbhlan a bhios ann an àireamh sin a dhùblachadh taobh a-staigh dà bhliadhna ach thuirt iad gu bheil iad misneachail.

"Tha aonta còig bliadhna againn le companaidh mhòr agus tha iadsan a' coimhead air grùnn phròiseactan a chur tron ghoireas san ath thrì no ceithir bliadhna.

"Nuair a thig e gu niùclasach, tha companaidh a' tilleadh thugainn le obair mhòr ùr an cois Sizewell C."

Tha cuideachd tòrr obrach gu bhith aca an cois phròiseactan ath-nuadhachail a tha san amharc gu h-ionadail, tha Mgr Allan ag ràdh.

Thòisich Donaidh Moireach na phreantas ann an Àranais bho chionn trì bliadhna

Tha 35 preantasan aca agus tha iad ag ràdh gum bu mhath leotha cothrom trèanaidh a thoirt do bharrachd dhaoine òga.

"Tha an luchd-obrach a' fàs sean agus tha daoine airson a bhith a' leigeil seachad an obair thairis air na beagan bhliadhnaichean ri thighinn agus feumaidh sinn na beàrnan sin a lìonadh.

"'S e an rud math le Navantia gu bheil iad airson na daoine againn fhèin a thrèanadh agus dèanamh cinnteach gu bheil an t-uabhas sgil aca," thuirt Mgr Allan.

Tha iomadh bliadhna de mhì-chinnt air a bhith a' cuairteachadh Àranais bho chaidh a stèidheachadh ann an 1974 ach thuirt Mgr Allan nach robh an goireas a-riamh cho seasmhach 's a tha e an-dràsta.