Aonta foirmeil 'son saor-phort uaine na Gàidhealtachd le 11,000 cosnadh na lùib

Tha Port Linne Chrombaigh an Inbhir Ghòrdain am measg grunn làraichean san t-saor-phort

Chaidh aonta a ruighinn gu foirmeil gus saor-phort uaine a stèidheachadh air a' Ghàidhealtachd.

Tha dùil gun teid 11,000 cosnadh a chruthachadh fo na planaichean 's gun tig na billeanan notaichean de dh'airgead tasgaidh chun na sgìre thairis air 25 bliadhna.

Tha an t-aonta eadar Saor-phort Inbhir Nis is Linne Chrombaidh, riaghaltasan na Rìoghachd Aonaichte agus na h-Alba agus Comhairle na Gàidhealtachd a' comharrachadh a' cheum mu dheireadh sa phròiseas a thòisich bho chionn còig bliadhna.

'S e àitichean a th' ann an saor-phuirt uaine taobh a-staigh chrìochan dùthcha far nach eil na riaghailtean àbhaisteach a thaobh chìsean agus cusbainn a' buntainn.

'S e com-pàirteachais de bhuidhnean sna roinnean prìobhaideach agus poblach a tha sa Phort, a' toirt a-steach Port Chaolas Chrombaidh, Port Neig, Highland Deephaven, agus Campas Inbhir Nis.

Tha Port Inbhir Nis cuideachd faisg air Linne Mhoireibh agus tè eile de phrìomh làraichean ICFGF

Thathar airson agus gun tèid ICFGF na phrìomh hub eadar-nàiseanta airson roinn a' chumhachd ath-nuadhachail le faochaidhean cìse agus taraifean nas ìsle do chompanaidhean.

Fon aonta thèid £25m de mhaoineachadh bho Riaghaltas na Rìoghachd Aonaichte a shaoradh a bheir taic do chompanaidhean ùra airson phròiseactean bun-structair ionadail.

Thathar an dòchas gum faighear in-ionmhas luach còrr air £6.5bn aig a' phort thairis air an ath 25 bliadhna.

Thuirt Rùnaire na h-Alba, Dùghlas Alexander, gu bheil stèidheachadh ICFGF fìor chudromach do ro-innleachd Riaghaltas na RA fàs eaconomach a thoirt air gach ceàrn den dùthaich.

Thuirt Leas-Phrìomh Mhinistear na h-Alba, Ceit Fhoirbeis gu bheil an t-aonta na "chlach-mhìle bhrosnachail".