Y Gyllideb: Gwario neu gynilo?

Gwario neu gynilo? Beth fydd Philip Hammond yn ei wneud yn ei Gyllideb gyntaf ers yr etholiad?

Gyda dyled y wlad yn tyfu nid crebachu ac ansicrwydd ynglŷn â Brexit, yn reddfol fe fydd y Canghellor eisiau chwarae'n saff ac osgoi unrhyw ddrama.

Mae na reswm maen nhw'n ei alw yn Spreadsheet Phil.

Ond mae canlyniad yr Etholiad Cyffredinol a phoblogrwydd polisïau Jeremy Corbyn wedi dychryn llawer o Geidwadwyr.

Mae 'na bwysau sylweddol arno i ddod â'r cynni ariannol i ben ac i fod yn feiddgar a dechrau gwario.

Ac mae'r ceisiadau am arian yn dod o bob cyfeiriad.

Mae 'na ddyfalu a fydd y cap ar gyflogau nyrsys ac athrawon yn cael ei godi

'Dan ni'n gwybod y bydd tai yn flaenoriaeth i Philip Hammond, er mae'n annhebyg o ildio i'r galwadau i fenthyg mwy i dalu am dai newydd.

Mae 'na bwysau sylweddol arno hefyd i wario mwy ar y gwasanaeth iechyd ac ar addysg yn Lloegr.

Os ydy o'n canfod mwy o arian yna fe fydd yn golygu bod Cymru yn cael cyfran o'r arian hefyd.

Codi'r cap ar gyflogau?

Mae nifer o aelodau'r cabinet hefyd wedi galw am fwy o arian i weithwyr sector gyhoeddus.

Mae'r cap ar gyflogau swyddogion heddlu a charchardai eisoes wedi'i godi, felly fydd yna newyddion da i nyrsys ac athrawon hefyd?

A beth am y credyd cynhwysol? Mae aelodau o bob plaid wedi mynegi pryder am y cynllun sy'n cyfuno chwe budd dal mewn i un taliad.

Felly gyda mwy o ardaloedd yng Nghymru yn symud i'r system yn fuan, a fydd y Canghellor yn barod i leihau'r amser y mae'n rhaid bobl aros tan y cawn nhw eu taliad cyntaf?

Mae AS Gorllewin Caerdydd wedi gofyn wrth Philip Hammond ddiogelu cyllideb S4C

Mae gan aelodau Cymreig restr o ofynion penodol hefyd.

Gydag S4C yn wynebu toriadau o £9m dros y dair blynedd nesaf, mae aelod Gorllewin Caerdydd, Kevin Brennan wedi ysgrifennu at Philip Hammond yn gofyn iddo warchod cyllieb y sianel yn ei Gyllideb.

• Adolygiad S4C: 'Dim disgwyl mwy o arian'

• S4C: Gweinidog ddim am ofyn am fwy o arian

• Cyllideb: Cymro yn cynghori'r Canghellor

Datganoli treth incwm, y dreth gorfforaeth a'r Doll Teithwyr Awyr yw blaenoriaethau Plaid Cymru. Maen nhw'n debyg o gael eu siomi.

Mae'n edrych yn debyg mai cael eu siomi fydd cenfogwyr Morlyn Bae Abertawe hefyd.

Roedden nhw'n gobeithio y byddai'r Canghellor yn defnyddio'r Gyllideb i fynegi ei gefnogaeth i'r cynllun, ond o beth 'dan ni'n ei ddeall, mae'r llywodraeth yn dal i edrych ar y ffigyrau.

Felly mae gan Phillip Hammond linell anodd i'w droedio.

Mae 'na bwysau mawr arno fo'n bersonol i gynnig rhywbeth i roi hwb i'r Ceidwadwyr er mwyn adennill rhywfaint o barch o fewn ei blaid.

Ond dyw cyflwr yr economi ddim caniatáu i'r Canghellor fod yn rhy hael - dydy o ddim eisiau benthyg gormod chwaith ac yn sicr fydd aelodau Ceidwadol ddim yn gadael iddo godi trethi.

Fe fydd o'n gobeithio osgoi unrhyw gamgymeriadau mawr, ond y peryg yw drwy fod yn rhy ofalus na fydd yn plesio unrhyw un yn y pendraw.