Llacio mesurau rheoli cefnogwyr pêl-droed Wrecsam a Chaer
- Cyhoeddwyd
Bydd y gêm ar 11 Mawrth drwy docyn yn unig
Mae'r heddlu wedi cyhoeddi y byddan nhw'n llacio mesurau diogelwch llym sydd fel arfer mewn grym ar gyfer gemau rhwng Wrecsam a Chaer.
Daeth y mesurau i rym yn wreiddiol oherwydd hanes o drafferthion rhwng cefnogwyr y ddau glwb sy'n chwarae yn y Gynghrair Cenedlaethol.
Dywedodd y Prif Uwch Arolygydd, Alex Goss, o Heddlu'r Gogledd eu bod wedi cydweithio gyda'r ddau glwb a Heddlu Sir Caer cyn dod i'r penderfyniad.
Bydd y gêm yn cael ei chynnal ar y Cae Ras ar 11 Mawrth.
Am y tro cyntaf ers sawl blwyddyn fe fydd cefnogwyr yn gallu teithio i'r gêm fel maen nhw'n dymuno, heb orfod cwrdd mewn man canolog a chael eu cludo mewn bysiau swyddogol i'r stadiwm.
Yr heddlu o flaen cefnogwyr yn 2014
Ond fe fydd mynediad i'r gêm drwy docyn yn unig.
Dywedodd y Prif Uwch Arolygydd Goss fod gan yr heddlu "ddyletswydd i sicrhau hawliau cefnogwyr i fynychu".
Ychwanegodd: "Hwn yw'r tro cyntaf mewn nifer o flynyddoedd nad yw mesurau arbennig mewn grym ar gyfer y Cae Ras ar gyfer y gêm hon.
"Ond byddwn yn annog cefnogwyr i gyrraedd y stadiwm mewn digon o amser ac i ymddwyn yn gyfrifol."