Cymru'n anelu am yr ail safle yn y Chwe Gwlad

Mae Hadleigh Parkes wedi dechrau pob un o gemau Cymru yn y Chwe Gwlad y tymor hwn

Bydd tîm rygbi Cymru yn anelu at orffen yn ail ym Mhencampwriaeth y Chwe Gwlad yn eu gêm olaf yn y gystadleuaeth yn erbyn Ffrainc ddydd Sadwrn.

Byddai buddugoliaeth a phwynt bonws yn erbyn Les Bleus yn Stadiwm Principality yng Nghaerdydd yn sicrhau'r ail safle.

Ond petai Cymru'n colli, a Lloegr a'r Alban yn ennill eu gemau nhw, fe allai dynion Warren Gatland orffen mor isel â'r pumed safle.

Mae rhybudd i deithwyr i'r brifddinas gynllunio o flaen llaw oherwydd nifer y cefnogwyr fydd yn teithio, a gorymdaith ddigyswllt yn ystod y dydd.

Saith newid i'r tîm

Bydd y gic gyntaf yng Nghaerdydd am 17:00, a bydd Cymru'n gobeithio ymestyn rhediad llwyddiannus yn erbyn Ffrainc yn y brifddinas.

Nid yw Les Bleus wedi ennill yng Nghaerdydd ers 2010, ond Ffrainc oedd yn fuddugol ym Mharis y llynedd, gan roi diwedd ar rediad gwael yn erbyn Cymru yn y Chwe Gwlad.

Mae Iwerddon eisoes wedi ennill y bencampwriaeth, ac fe fyddan nhw'n ceisio sicrhau'r Gamp Lawn yn erbyn Lloegr yn Twickenham.

Mae Warren Gatland wedi gwneud saith newid 'r tîm gurodd Yr Eidal ar gyfer ymweliad y Ffrancwyr, gan gynnwys dewis Dan Biggar yn safle'r maswr yn lle Gareth Anscombe.

Mae hefyd wedi galw Leigh Halfpenny yn ôl i safle'r cefnwr, gyda Liam Williams yn symud allan i'r asgell.

Alun Wyn Jones fydd yn arwain y tîm unwaith eto, ar ôl cael ei ddewis yn yr ail reng.

Tîm Cymru

Leigh Halfpenny; George North, Scott Williams, Hadleigh Parkes, Liam Williams; Dan Biggar, Gareth Davies; Rob Evans, Ken Owens, Tomas Francis, Cory Hill, Alun Wyn Jones (C), Justin Tipuric, Josh Navidi, Taulupe Faletau.

Eilyddion: Elliot Dee, Nicky Smith, Lee, Bradley Davies, Aaron Shingler, Aled Davies, Gareth Anscombe, Steff Evans.

• Holl newyddion Pencampwriaeth y Chwe Gwlad 2018

Mathieu Bastareaud fydd capten Les Bleus yn Stadiwm Principality, ar ôl i'r bachwr Guilhem Guirado gael anaf i'w ben-glin.

Mae Adrien Pelissi, Cedate Gomes Sa a Gael Fickou hefyd wedi eu galw i'r 15.

Cyngor teithio

Bydd giatau Stadiwm Principality yn agor am 13:30, ac unwaith eto mae cefnogwyr yn cael eu hannog i gyrraedd yn gynnar oherwydd y mesurau diogelwch ar y giatiau.

Bydd ffyrdd canol y ddinas yn cau rhwng 13:00 a 20:00:

• Ffordd y Brenin o'r gyffordd â Heol y Gogledd i'r gyffordd â Heol y Dug;

• Heol Ddwyreiniol y Bont-faen o'r gyffordd â Heol y Gadeirlan i'r gyffordd â Heol y Porth;

• Stryd Tudor o'r gyffordd â Clare Road i'r gyffordd â Stryd Wood;

• Plantagenet Street a Beauchamp Street o'r cyffyrdd â Despenser Place i'r cyffyrdd â Stryd Tudor;

• Heol Saunders o'r gyffordd â Heol Eglwys Fair;

• Heol y Tollty ar ei hyd;

• Heol Penarth o'r gyffordd â Heol Saunders i'r fynedfa sy'n arwain at gefn yr Orsaf Ganolog.

Bydd y ffyrdd canlynol ynghau ar eu hyd: Heol y Dug, Heol y Castell, Stryd Fawr, Heol Eglwys Fair, Stryd Caroline, Stryd Wood, y Sgwâr Canolog, Heol y Porth, Stryd y Cei, Plas y Neuadd, Y Gwter, Heol y Parc, Stryd Havelock a Heol Scott.

Bydd gorymdaith Diwrnod Gwrth-Hiliaeth blynyddol y Cenhedloedd Unedig hefyd yn digwydd ddydd Sadwrn, gan greu fwy o brysurdeb yng nghanol y ddinas.

Cymru v Ffrainc, 17:00, Stadiwm Principality, Caerdydd.