'Dim ffrae' wrth newid arweinydd UKIP yn y Cynulliad

Bydd Neil Hamilton yn canolbwyntio ar arwain y blaid yng Nghymru, medd Caroline Jones, arweinydd newydd grŵp UKIP yn y Cynulliad

Mae arweinydd newydd grŵp UKIP yn y Cynulliad, Caroline Jones yn dweud fod y broses o drosglwyddo'r awenau rhyngddi hi a Neil Hamilton wedi bod yn "gyfeillgar".

Dywedodd Caroline Jones wrth BBC Cymru nad oes ffrae wedi bod rhwng y ddau ac y byddant yn cydweithio.

Bydd yntau meddai, yn canolbwyntio ar fod yn arweinydd y blaid yng Nghymru.

Cafodd Mr Hamilton ei ddisodli fel arweinydd grŵp UKIP yn y Cynulliad yn dilyn pleidlais ymhlith ACau'r blaid.

Dywedodd Ms Jones, un o ACau rhanbarthol De Orllewin Cymru: "Fe fydd Neil yn canolbwyntio ar fod yn arweinydd Cymru ac fe fydda' i'n canolbwyntio ar y Cynulliad. Fe fydd yn fenter ar y cyd, mae'n sefyllfa lle mae pawb yn ennill."

"Mae gyda chi ddyn sy'n arwain yng Nghymru a menyw sy'n arwain yn y Cynulliad, ac fe fydd hynny'n golygu ein bod yn apelio at gynulleidfa ehangach".

Ychwanegodd nad yw'n meddwl y bydd cael dau arweinydd yng Nghymru yn "ddryslyd".

'Arddull wahanol'

Dywedodd Ms Jones hefyd bod "y drws ar agor" i'r AC rhanbarthol Mandy Jones ymuno â grŵp UKIP ym Mae Caerdydd, sydd â phum aelod ar hyn o bryd.

Pan ddaeth Mandy Jones yn AC yn dilyn ymddiswyddiad Nathan Gill, fe ddywedodd nad oedd eisiau bod yn rhan o grŵp UKIP yn y Cynulliad, gan honni fod rhai aelodau wedi ei bwlio.

Dywedodd Caroline Jones: "Mae gen i arddull wahanol ac fe fydd 'na newidiadau.

"Fe fyddaf yn siarad gyda staff UKIP yn y Cynulliad [ddydd Iau] - fe fydd newidiadau ond mae eu swyddi i gyd yn ddiogel.

"Rwyf eisiau edrych ar yr hyn rydyn yn ei wneud a gweld sut allwn ni ei wneud yn well."