Disgwyl cyhoeddiad am gynllun morlyn Abertawe

Byddai'r morlyn yn gallu darparu pŵer i 120,000 o dai pe bai'n cael ei gymeradwyo

Mae BBC Cymru ar ddeall bod disgwyl cyhoeddiad ar gynllun £1.3bn morlyn llanw Bae Abertawe ddydd Mercher.

Mae'r prosiect wedi derbyn cefnogaeth adolygiad annibynnol gafodd ei gomisiynu gan Lywodraeth y DU yn 2017, ond mae gweinidogion wedi dweud bod yn rhaid i'r cynllun gynnig gwerth am arian cyhoeddus.

Mae'r prif weinidog Carwyn Jones wedi cynnig £200m o arian Llywodraeth Cymru i helpu gwireddu'r cynllun, yn dilyn adroddiadau ei fod am gael ei wrthod.

Mae Ysgrifennydd Cymru, Alun Cairns wedi mynegi pryder am y gost, gan ddweud bod "y ffigyrau yn ofnadwy".