Cyhoeddi enw dyn fu farw ar lôn ddwyreiniol yr M4
- Cyhoeddwyd
Mae'r heddlu yn cefnogi teulu Jeffrey Paul Williams, 56 oed, a fu farw yn y gwrthdrawiad
Mae Heddlu Gwent wedi cadarnhau enw dyn fu farw yn dilyn gwrthdrawiad ar yr M4 ddydd Iau.
Roedd Jeffrey Paul Williams yn 56 oed ac yn dod o Gwmbrân.
Roedd ei gar mewn gwrthdrawiad â dau gar arall ar lôn ddwyreiniol y draffordd rhwng Caerdydd a Chasnewydd.
Bu farw o'i anafiadau ac mae plismyn arbenigol yn rhoi cymorth i'w deulu.
Apelio am wybodaeth
Mae dyn 60 oed o Sir Buckingham yn y ddalfa ar ôl cael ei arestio ar amheuaeth o achosi marwolaeth trwy yrru'n beryglus.
Mae ymchwiliad yr heddlu'n parhau ac maent yn apelio ar dystion neu aelodau o'r cyhoedd sydd â lluniau 'dashcam' o'r gwrthdrawiad i gysylltu.
Fe ddigwyddodd y ddamwain tua 16:35 brynhawn Iau rhwng cyffyrdd 28, Parc Tredegar a 30, Pentwyn, ac roedd y lôn ddwyreiniol ar gau am wyth awr tan oriau mân y bore.
Roedd y lôn orllewinol am gau am hanner awr er mwyn i ambiwlans awyr allu glanio ar y ffordd.
Cafodd dau berson eu cludo i'r ysbyty.
Roedd tri char yn y gwrthdrawiad - car Perodua du y dyn a fu farw, car Honda 4x4 y gyrrwr sydd yn y ddalfa ac Audi A6 lliw arian.