Diffoddwyr yn delio â thân mewn siop yng Nghaernarfon
- Cyhoeddwyd
Cafodd y gwasanaeth tân eu galw i'r digwyddiad ar Stryd Y Llyn fore Llun
Mae'r gwasanaethau brys wedi bod yn delio gyda thân mewn siop yng nghanol Caernarfon fore Llun.
Cafodd y gwasanaeth tân a'r gwasanaeth ambiwlans eu galw i'r digwyddiad ar Stryd Y Llyn ychydig cyn 09:00.
Dywedon nhw fod chwe chriw wedi bod yn delio â'r fflamau, wnaeth gynnau yn siop ffonau symudol Get Connected ar y stryd.
Roedd mwg i'w weld yn dod o ffenestri'r adeilad, gan gynnwys o'r fflatiau sydd uwchben y siop.
Mae'r fflamau bellach wedi'u diffodd ond bydd criwiau'n parhau yno am rai oriau i sefydlogi'r safle.
Dywedodd John Williams, sy'n gweithio mewn siop arall ar y stryd, bod mwg yn "llifo o'r adeilad"
Bydd y gwasanaeth tân a'r heddlu yn cynnal ymchwiliad ar y cyd i achos y digwyddiad.
Bu'n rhaid i bobl hefyd adael rhai adeiladau gerllaw wrth i swyddogion ddelio gyda'r tân.
Mae'r ffordd ar gau, ac mae'r gwasanaethau brys yn annog y cyhoedd i osgoi'r ardal.
'Mwg a dŵr'
Dywedodd llefarydd ar ran Get Connected mai rheolwr y siop yng Nghaernarfon, Garry Roberts wnaeth alw'r gwasanaethau brys.
"Pan aeth i mewn y bore 'ma, roedd yn gallu arogli mwg ac yn gweld dŵr yn llifo o'r to," meddai'r llefarydd.
"Ry'n ni'n credu bod y tân wedi dechrau yn y fflat uwchben y siop, sy'n wag. Yn ffodus, does neb wedi'u hanafu ac mae pawb yn ddiogel."