Galwadau ffôn gan dwyllwyr ar gynnydd yn ne Cymru

Mae yna hefyd sawl enghraifft o negeseuon testun sy'n rhan o'r sgam ac maen nhw'n gofyn i bobl gadarnhau eu manylion banc

Mae yna bryder bod cannoedd o bobl wedi cael eu targedu yn yr wythnosau diwethaf yn unig yn rhanbarth Heddlu De Cymru gan dwyllwyr yn honni eu bod yn blismyn.

Mae'r llu'n pryderu'n gynyddol bod y twyllwyr yn dwyn miloedd o bunnoedd mewn rhai achosion, yn aml oddi wrth bobl oedrannus a bregus.

Maen nhw'n ffonio unigolion yn honni mai plismyn ydyn nhw, gan ddweud bod eu cyfrifon banc dan fygythiad a bod angen tynnu eu harian allan.

Mae'r arian wedyn yn cael ei drosglwyddo i gyfrif y twyllwyr neu ei roi yn nwylo aelod arall o'r giang.

Dywed Heddlu'r De fod yna achosion tebyg ar draws y DU, ond mae nifer yr achosion o fewn eu rhanbarth wedi cynyddu yn y misoedd diwethaf.

Nid yw'r llu wedi cadarnhau faint o bobl sydd wedi cael eu twyllo, ac maen nhw'n dweud nad ydy'r twyllwyr wedi llwyddo i gael arian ymhob achos.

'Awyddus i gael gwared' ar y bobl ben arall y lein

Yn gynharach eleni fe wnaeth yr heddlu rannu stori menyw 95 oed o Benarth sydd wedi cael ei thwyllo deirgwaith mewn 10 mis, gan golli bron i £20,000.

Y tro cyntaf fe gafodd Margaret Turner alwad gan ddyn yn honni bod yn aelod o dîm atal twyll banc HSBC.

Dywedodd wrthi fod ei chyfrif banc dan fygythiad a bod angen iddi roi ei harian mewn cyfrif neilltuol, gan roi manylion y cyfrif hwnnw iddi.

Hefyd fe roddodd rif ffôn Heddlu Llundain iddi er mwyn iddi allu cadarnhau'r alwad, ond fe adawodd y llinell ffôn ar agor ac felly roedd yn dal yn siarad gyda'r twyllwr ei hun pan ffoniodd y rhif hwnnw.

Fe gollodd £5,500, ond fe lwyddodd i gael rhywfaint o'r arian yn ôl.

Ar yr ail achlysur, fe honnodd y galwr ei fod yn aelod o'r Heddlu Twyll Difrifol, ac fe ddaeth rhywun mewn person i'w chartref i gasglu £7,000 mewn arian parod.

Yn y trydydd achos, fe alwodd dyn yn honni bod yn sarjant gan ddweud fod twyllwyr wedi tynnu arian o'i chyfrif, a'i chynghori i dynnu'r gweddill allan i'w gadw'n ddiogel a'i ddanfon ato.

Y tro hwn fe gollodd £7,000. Hefyd fe gollodd gemwaith gwerth miloedd o bunnau ar ôl i'r twyllwyr ei pherswadio nad oedd yn ddiogel i'w gadw yn ei chartref.

Dywedodd Miss Turner wrth yr heddlu: "Fe wnaethon nhw fy ffonio yn gynnar yn y bore a dydw i ddim ar fy ngorau yn y bore."

Dywedodd ei bod mor "awyddus i gael gwared" ar y bobl ben arall y ffôn neu ei bod "wedi gwneud popeth" roedden nhw'n awgrymu.

"Wnes i sylweddoli beth oedd yn digwydd pan ges i ddatganiad gan y banc ac ro'n i mewn dyled. Galla'i ddim credu sut fues i mor dwp. Mae'n beth ofnadwy i wneud i unrhyw un.

"Fy neges i bobl eraill sy'n derbyn galwad fel hun yw i ddweud wrth yr heddlu ar unwaith. Peidiwch â rhoi dim byd i'r twyllwyr."

Mae heddluoedd ar draws y DU yn delio ag achosion o'r fath dan Ymgyrch Signature.

Mae'r twyllwyr, medd yr heddlu, yn hynod o soffistigedig ac mae'r troseddau'n rhai "creulon sy'n manteisio ar unigolion mwyaf bregus cymdeithas".

Maen nhw'n pwysleisio na fyddai'r heddlu byth yn cysylltu â phobl yn y fath fodd nac yn gofyn am arian, a dylai pobl roi'r ffôn i lawr yn syth.

Dylai unrhyw un sy'n derbyn galwad ffôn amheus gysylltu â'r heddlu trwy ffonio 101.