Sefydlu tîm achub iseldir cyntaf Cymru

9 Medi 2018

Môn Sar — Disgrifiad o’r llun,
Mae Tîm Achub Môn wedi paratoi am unrhyw argyfwng

Mae tîm achub iseldir cyntaf Cymru yn barod i ddechrau gweithredu yn dilyn tair blynedd o hyfforddiant.

Mae'r tîm o tua 30 o wirfoddolwyr ar Ynys Môn yn cynnwys cyn-aelodau o'r lluoedd, seicolegydd ac astro-ffisegydd.

Cafodd Môn SAR (Search and Rescue) ei sefydlu yn 2015, ond mae wedi cymryd tair blynedd er mwyn hyfforddi pawb i'r lefel angenrheidiol.

Maen nhw bellach ar gael 24 awr y dydd i ymateb i geisiadau am gymorth gan yr heddlu a gwylwyr y glannau.

Arweinydd y tîm yw Andy Camwell, a dywedodd: "Ry'n ni wedi dod â chriw o bobl heb unrhyw brofiad bron, a chreu tîm a fydd yn gaffaeliad.

"Ry'n ni'n barod i weithredu o fryniau i ddŵr uchel - a cofiwch bod rhai o'r bryniau y gallen ni fod yn chwilio yn uwch na rhai yn Lloegr."

Bydd y tîm yn gweithredu ar draws Ynys Môn o'r traethau i fryniau a fforestydd yr ardal.

Un o'r prif ddyletswyddau fydd cynorthwyo Heddlu Gogledd Cymru i chwilio am bobl fregus sydd ar goll, ac mae'r tîm yn rhagweld mai dyna fydd 80% o'u gwaith.

Yn wahanol i dimau achub mynydd, sydd yn aml yn gwybod lleoliad y person y maen nhw'n chwilio amdanynt - mae pwyslais Môn Sar yn fwy ar chwilio.

Eglurodd Mr Camwell: "Mae'r tîm wedi hyfforddi i chwilio, delio gydag argyfyngau meddygol, mordwyo ac i fedru cynorthwyo pobl fregus.

"Ry'n ni'n unigryw. Rhaid i ni fedru cyfathrebu'n effeithiol gyda gwylwyr y glannau, Heddlu'r Gogledd, timau achub mynydd a thimau achub dŵr - ry'n ni yma i helpu."

Am y misoedd cyntaf fe fydd Tîm Achub Mynydd Dyffryn Ogwen yn goruchwylio'r tîm.

Dywedodd Prif Gwnstabl dros dro Heddlu Gogledd Cymru, Gareth Pritchard: "Mae'r tîm wedi gweithio galed am fisoedd lawer i gyrraedd statws gweithredol, ac rwy'n falch i weld eu bod nhw wedi llwyddo gyda'r cam pwysig yma."

Mae'r heddlu wedi rhoi hen gerbyd heddlu i'r uned er mwyn ei ddefnyddio i weithredu, ac er fod hwnnw'n cael ei gadw yng ngorsaf heddlu Llangefni ar hyn o bryd, mae'r tîm wrthi'n chwilio am ganolfan parhaol ar gyfer cadw'u hoffer.