Dawns flodau: Pryder bod rhai wedi'u cynnwys ar draul plant lleol

Mae'r ddawns flodau yn rhan ganolog o'r seremoni Orseddol yn yr Eisteddfod Genedlaethol

Mae rhai rhieni ac athrawon yn Wrecsam wedi codi pryderon bod plant o du allan i'r ardal wedi cael eu cynnwys yn y ddawns flodau eleni ar draul rhai plant lleol.

Mae'r ddawns flodau yn rhan ganolog o'r seremoni Orseddol yn yr Eisteddfod Genedlaethol, ac yn gyfle unigryw i blant lleol gymryd rhan.

Dywedodd un athrawes leol, oedd eisiau aros yn ddienw, ei bod "mor siomedig" gan ychwanegu bod y "plant lleol yma bron wedi eu hepgor".

Yn ôl cofiadur yr Orsedd, Christine James, "mae'r prosiect wedi cynnig cyfle i blant ysgolion pob rhan o Wrecsam gymryd rhan yn y ddawns".

Ychwanegodd bod yr angen wedi codi am "aelodau ychwanegol i ymuno â'r tîm" a bod plant o ysgol ddawns o ardal Penllyn wedi'u dewis er mwyn "hwyluso'r broses".

'Cyfle prin wedi'i golli'

Mae'r BBC ar ddeall mai plant blwyddyn 7 yn unig gafodd eu dewis i gymryd rhan eleni.

Wedi i'r galw godi am aelodau ychwanegol, yn hytrach na chynnwys plant o flynyddoedd eraill yn lleol, estynnwyd y gwahoddiad i blant o rannau eraill o Gymru i lenwi'r bylchau.

Dywedodd athrawes, oedd am aros yn ddienw, bod plant lleol "wedi gweithio'n galed dros gyfnod hir i godi arian".

"Fydd dim Eisteddfod arall yn dod i Wrecsam am flynyddoedd," meddai.

"Efallai mai'r ddadl oedd cadw'r safon, ond mae plant fy ysgol i ac ysgolion lleol eraill yn hollol abl.

"Bwriad y 'Steddfod yw dod â'r gymuned ynghyd – dyma gyfle prin wedi'i golli."

Dywedodd cofiadur yr Orsedd bod y prosiect wedi cynnig cyfle i blant ysgolion pob rhan o Wrecsam gymryd rhan

Mae Lleucu Sion, sy'n fam i dri o blant sy'n mynychu ysgol yng nghyffiniau Wrecsam, hefyd yn siomedig.

"Mae'r plant wedi bod wrthi ers dwy flynedd yn trefnu cyngherddau a digwyddiadau i godi arian," meddai.

"Os oedd angen mwy o blant, pam na ofynnwyd i flynyddoedd 5 a 6 hefyd, nid dim ond blwyddyn 7?"

Ychwanegodd fod digwyddiad 'Croeso i Wrecsam!' yn y Babell Lên ddydd Sadwrn "yn cynnwys plant lleol, ac fe ddenodd lawer o deuluoedd di-Gymraeg i'r Maes.

"Byddai'r ddawns flodau wedi gallu gwneud yr un peth."

'Hwyluso'r broses'

Eglurodd cofiadur yr Orsedd, Christine James, pan daeth i'r amlwg bod angen mwy o aelodau, bod rhai o ysgol ddawns sy'n gysylltiedig ag aelod o'r tîm trefnu wedi eu dewis er mwyn "hwyluso'r broses".

"Mae Cari Sioux o Rosllannerchrugog yn aelod allweddol o dîm trefnu'r ddawns flodau ers y cychwyn ddwy flynedd yn ôl," meddai.

"Mae'r prosiect wedi cynnig cyfle i blant ysgolion pob rhan o Wrecsam i gymryd rhan yn y ddawns.

"Yn ystod y broses baratoi, cododd yr angen am aelodau ychwanegol i ymuno â'r tîm.

"Cynigiodd Cari gymorth er mwyn hwyluso'r broses gan ddod ag aelodau o'i hysgol ddawns yn ardal Penllyn i ymuno â'r grwp.

"Drwy wneud hyn, sicrhawyd fod tîm llawn ar gael ar gyfer pob seremoni a chynnal safon y perfformiad."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.