Robert Croft yn gadael Clwb Criced Morgannwg

Dechreuodd Robert Croft chwarae dros Forgannwg nôl yn 1989

Mae Robert Croft wedi gadael ei rôl fel prif hyfforddwr Clwb Criced Morgannwg wedi bron i dair blynedd yn y swydd.

Mewn datganiad, dywedodd Croft ei fod wedi gallu "gwireddu breuddwyd" drwy chwarae, ac yna hyfforddi'r clwb.

Fe ymunodd â Morgannwg fel chwaraewr yn 1989, ac ef oedd y Cymro cyntaf i gyrraedd y garreg filltir ddwbl o 10,000 o rediadau a 1,000 o wicedi.

Chwaraeodd 21 o gemau prawf a 50 o gemau undydd i Loegr.

Daw'r cyhoeddiad am ei ymadawiad yn dilyn adolygiad annibynnol allanol ar dymor y clwb.

Fe orffennodd Morgannwg ar waelod ail adran Pencampwriaeth y Siroedd y tymor diwethaf.

Wythnos diwethaf fe gyhoeddodd y clwb fod Hugh Morris yn camu o'i rôl fel cadeirydd, ond yn parhau fel prif weithredwr.

Ar y pryd, dywedodd y clwb y byddai mwy o gyhoeddiadau yn yr wythnosau i ddod.