Dyn 19 oed yn euog o achosi niwed corfforol difrifol

Fe gafodd dwy fenyw "anafiadau difrifol" yn ystod y digwyddiad ym mis Ebrill

Mae dyn o Gasnewydd wedi ei gael yn euog o ddefnyddio ei gerbyd fel arf i daro dau berson ar noson allan yng Nghasnewydd.

Roedd McCauley Cox, 19, yn gwadu dau gyhuddiad o achosi niwed corfforol difrifol yn fwriadol.

Fe gafodd dwy fenyw anafiadau difrifol ar ôl cael eu taro tra'n disgwyl am dacsi ar Ffordd Cambrian yn oriau mân 29 Ebrill.

Dywedodd y barnwr Daniel Williams fod Cox yn wynebu "cyfnod sylweddol" mewn sefydliad ar gyfer troseddwyr ifanc o ganlyniad i'w ymddygiad "gwarthus" yn gynharach eleni.

Bydd Cox yn cael ei ddedfrydu ddydd Gwener.