Rheolwr CPD Bangor, Craig Harrison yn gadael y clwb

Fe gafodd Craig Harrison ei benodi'n rheolwr CPD Bangor ym mis Mai eleni

Mae CPD Bangor wedi cadarnhau bod ei rheolwr, Craig Harrison wedi gadael y clwb.

Mae Harrison wedi gadael er mwyn ymgymryd â swydd hyfforddi, llawn amser gyda Chei Connah yn Uwch Gynghrair Cymru.

Fe gafodd Harrison ei benodi ym mis Mai eleni yn dilyn cwymp y clwb o Uwch Gynghrair Cymru.

Aeth y clwb i lawr am fod Cymdeithas Bêl-droed Cymru wedi gwrthod trwydded ddomestig iddyn nhw am resymau ariannol.

Mae gan Harrison brofiad helaeth o reoli clybiau yng Nghymru yn dilyn cyfnod llwyddiannus gydag Airbus UK Brychdyn a'r Seintiau Newydd, cyn iddo gael ei benodi'n rheolwr Hartlepool.

• Harrison yw rheolwr newydd CPD Bangor

• CPD Bangor: Dau o'r bwrdd yn gadael

• CPD Bangor am herio diffyg trwydded

Fe gollodd ei swydd gydag Hartlepool yng Nghyngrair Cenedlaethol Lloegr wedi naw mis.

'Iawndal'

Yn ôl gwefan CPD Bangor, mae'r ddau glwb "wedi dod i gytundeb ynglŷn ag iawndal".

Bydd Cyfarwyddwr Pêl-Droed Bangor, Stephen Vaughan Jnr. nawr yn cymryd gofal o'r tîm cyntaf a bydd yn cael ei gynorthwyo gan Luke Purcell ac Alan Lewer.

Dywedodd Mr Vaughan Jnr.: "Fe ddaeth y newyddion fel sioc i ni'r bore ma fod Craig eisiau gadael.

"Mae ein sylw nawr yn troi at ein gêm yn erbyn Mold Alexandra yng Nghwpan Cymru ble bydd rhaid i ni gyd-dynnu er mwyn sicrhau ein bod yn camu ymlaen i'r rownd nesaf."

Mae Bangor yn y pumed safle ar hyn o bryd yng Nghynghrair Undebol Huws Gray, 14 pwynt y tu ôl i Airbus UK Brychdyn sydd ar y brig.