Achub 137 o anifeiliaid o loches ger Yr Wyddgrug

Mae 137 o anifeiliaid wedi cael eu hachub o loches ger Yr Wyddgrug oherwydd gofidiau ynghylch dyfodol y cwmni.

Cafodd yr anifeiliaid eu cludo o safle lloches Capricorn ddydd Mawrth wedi gofidiau am reolaeth gweinyddiaeth y cwmni, ac fe gafodd yr anifeiliaid eu cymryd i feddiant yr RSPCA wedi naw awr o sicrhau diogelwch yr anifeiliaid.

Yn ôl yr elusen doedd y safle ddim yn addas bellach.

Daeth y canfyddiadau ar ôl ymchwiliad gan y Comisiwn Elusennol i weinyddiaeth y safle'r llynedd yn dilyn pryderon ynghylch rheolaeth a diogelwch yr anifeiliaid.

Ym mis Rhagfyr 2016 fe ddatgelodd rhaglen BBC Cymru, Week In Week Out bod y safonau yn y lloches yn wael.

Yn ôl Martyn Hubbard o'r RSPCA: "Roedd y weithred o symud yr anifeiliaid yn un anodd a chymhleth gyda nifer fawr o anifeiliaid a rhywogaethau. Bydd yr RSPCA yn gweithio er mwyn sicrhau eu diogelwch ar gyfer y dyfodol."

Ymhlith yr anifeiliaid oedd:

• 41 cath;

• 17 aderyn;

• 14 cwningen;

• 10 ci;

• 10 bochdew;

• 8 mochyn cwta;

• 5 madfall (dreigiau barfog);

• 5 degw;

• 5 o foch;

• 5 ffured;

• 3 neidr;

• 2 gerbil;

• tsintsila;

• gŵydd.