Llys yn cael dynes yn euog o gam-drin bachgen

Roedd Miranda Parry yn gwadu'r holl gyhuddiadau yn ei herbyn

Mae dynes 42 oed o Wrecsam wedi ei chael yn euog o droseddau rhyw hanesyddol yn erbyn bachgen ifanc.

Roedd Miranda Parry wedi gwadu 10 o gyhuddiadau - saith o ymosod yn anweddus, dau o ymddwyn yn anweddus ac un o greulondeb yn erbyn plentyn.

Fe gymerodd y rheithgor yn Llys Y Goron Yr Wyddgrug llai na dwy awr i wneud eu dyfarniad.

Dywedodd y barnwr y byddai'n gohirio dedfrydu er mwyn derbyn adroddiadau seiciatrig, ond ei fod "yn amlwg ystyried dedfryd o garchar".

Roedd y cyhuddiadau'n dyddio'n ôl i 2000-01 pan roedd y diffynnydd yn ei 20au cynnar.

Mewn fideo a gafodd ei ddangos i'r llys o gyfweliad gyda'r heddlu, dywedodd y dioddefwr ei fod "yn dal i deimlo cywilydd ynghylch y peth".

Yn ôl yr erlyniad roedd Parry wedi cyffwrdd yn y bachgen yn anweddus a'i orfodi yntau i gyffwrdd ynddi hi.

Roedd yna honiad hefyd ei bod wedi ymosod yn anweddus arno ar un achlysur arall gyda chwistrell ar ôl dweud bod angen iddo gymryd ei feddyginiaeth.

Cafodd yr achos ei gynnal yn Llys Y Goron Yr Wyddgrug

Mynnodd y diffynnydd ei bod wastad wedi trin y bachgen yn "dda", gan fynd ag o i'r siopau a phrynu melysion a chylchgronnau iddo.

Gwadodd ei bod wedi ei gam-drin, na'i fwlio na'i orfodi i sefyll am oriau yng nghornel ystafell, gan ddweud wrth y llys: "Dydw i erioed wedi bod yn annifyr tuag ato."

Roedd y bachgen wedi dweud wrth ei fam ei fod yn cael ei gam-drin, ac fe gafodd yr achos i gyfeirio at wasanaethau cymdeithasol, ond dim ond ar ôl iddo fynd at yr heddlu yn 2017 y cafodd Parry ei harestio.

Roedd y dioddefwr wedi ailadrodd yr honiadau i'r awdurdodau ar sawl achlysur cyn hynny.

Clywodd y llys bod y diffynnydd wedi rhoi'r ateb "no comment" i gwestiynau'r heddlu.