QC i osod rheolau newydd i ymchwiliad Carl Sargeant

Roedd Carl Sargeant yn Ysgrifennydd Cymunedau nes iddo gael ei ddiswyddo

Bydd rheolau newydd yn cael eu gosod ar gyfer ymchwiliad annibynnol i ddiswyddiad y cyn-weinidog yn Llywodraeth Cymru, Carl Sargeant.

Cafodd Mr Sargeant ei ganfod yn farw ddyddiau ar ôl i'r prif weinidog ar y pryd, Carwyn Jones, ei ddiswyddo.

Roedd Mr Sargeant wedi ei gyhuddo o gamymddwyn rhywiol - cyhuddiadau roedd yn eu gwadu.

Cyhoeddodd Mr Jones y byddai ymchwiliad dan arweiniad QC, ond penderfynodd yr Uchel Lys ei fod wedi ymddwyn yn anghyfreithlon wrth benderfynu sut y byddai'r ymchwiliad yn cael ei gynnal.

Gweddw Mr Sargeant, Bernie, wnaeth gyflwyno'r her gyfreithiol.

Carwyn Jones oedd yn gyfrifol am ddiswyddo Carl Sargeant

Dywedodd olynydd Mr Jones fel prif weinidog, Mark Drakeford, y byddai pennaeth adran cyfraith Llywodraeth y DU, Jonathan Jones QC, yn ystyried sut y byddai'r ymchwiliad yn cael ei redeg.

Ychwanegodd Mr Drakeford y byddai ymchwiliad i os cafodd newyddion am y diswyddiad ei ryddhau i'r wasg yn cael ei gyhoeddi ar ôl i gwest Mr Sargeant orffen.

Cafodd y cwest ei ohirio ym mis Tachwedd wedi wythnos o dystiolaeth.

Mae arweinydd y Ceidwadwyr yn y Cynulliad wedi galw am gyhoeddi'r adroddiad ar ryddhau gwybodaeth i'r wasg ar unwaith.

Dywedodd Paul Davies AC ei bod yn "hanfodol" bod aelodau yn cael craffu ar waith y cyn-brif weinidog a'i dîm.

Mae arweinydd Plaid Cymru wedi croesawu'r penderfyniad i gyhoeddi'r adroddiad ar ryddhau gwybodaeth.

Ond dywedodd Adam Price AC bod yr oedi yn "ddiangen".