Cyhoeddi manylion deiseb Galw Nôl

Roedd Chris Davies wedi pledio'n euog i gyflwyno dogfennau ffug a chamarweiniol wrth hawlio treuliau ym mis Mawrth

Wedi i Lefarydd Tŷ'r Cyffredin gadarnhau y bydd deiseb Galw Nôl yn etholaeth Brycheiniog a Sir Faesyfed, mae'r manylion wedi'u cyhoeddi.

Yr Aelod Seneddol Chris Davies fydd testun y ddeiseb Galw Nôl yn ei etholaeth wedi iddo gyfaddef hawlio treuliau ffug.

Cafodd yr AS Ceidwadol ddedfryd yn Llys y Goron Southwark ddydd Mawrth o wasanaeth cymunedol a dirwy o £1,500.

Roedd yr AS, sy'n 51, eisoes wedi pledio'n euog ym mis Mawrth i gyflwyno dogfennau ffug a chamarweiniol wrth hawlio treuliau.

Bydd gan etholwyr Brycheiniog a Sir Faesyfed yr hawl i arwyddo'r ddeiseb rhwng 09:00 ar ddydd Iau, 9 Mai tan 17:00 ar ddydd Iau, 20 Mehefin 2019.

Y mannau swyddogol ar gyfer arwyddo'r ddeiseb yw:

• Neuadd y Sir, Llandrindod;

• Neuadd Brycheiniog, Aberhonddu;

• Llyfrgell Llanandras, Llanandras;

• Llyfrgell Ystradgynlais, Ystradgynlais;

• Siambr y Cyngor, Y Gelli Gandryll;

• Tŷ Clarence Hall, Crucywel.

Bydd y canolfannau ar agor ar yr amseroedd canlynol:

• Dydd Llun - 09:00-17:00 (heblaw Gŵyl y Banc y gwanwyn)

• Dydd Mawrth - 08:00-17:00

• Dydd Mercher - 09:00-20:00

• Dydd Iau - 09:00-17:00

• Dydd Gwener - 09:00-17:00

Os fydd 10% o'r etholwyr yn arwyddo'r ddeiseb, yna fe fydd isetholiad yn cael ei gynnal i ddewis Aelod Seneddol newydd.

Mae gan bob oedolyn sydd dros 18 oed cyn diwedd y cyfnod arwyddo ac sydd wedi cofrestru i bleidleisio yn gymwys i arwyddo'r ddeiseb.

Wedi i'r Llefarydd gyhoeddi'r ddeiseb yn San Steffan, mae'r Swyddog Deiseb wedi cyhoeddi mai'r nifer sydd â'r hawl i arwyddo yw 53,032.

Os fydd 5,303 felly yn arwyddo, fe fydd Chris Davies yn cael ei ddisodli fel AS Brycheiniog a Sir Faesyfed.