Marwolaeth Pen y Gogarth: Cyhoeddi enw bachgen 13 oed

Mae enw bachgen 13 oed a fu farw ar ôl cael ei dynnu o'r môr ger Pen y Gogarth, Llandudno, nos Sadwrn wedi ei gyhoeddi.

Roedd Dillan Brown yn ddisgybl yn Ysgol John Bright yn y dref.

Cafodd ei dynnu o'r môr ychydig wedi 21:20 nos Sadwrn wedi i Wylwyr y Glannau dderbyn galwad am 20:55.

Wrth roi teyrnged, dywedodd pennaeth yr ysgol bod gan Dillan "galon aur".

Wedi'r digwyddiad, dywedodd Heddlu Gogledd Cymru nad ydyn nhw'n credu bod amgylchiadau'r farwolaeth yn amheus.

Cafodd y bachgen ei dynnu o'r dŵr ym Mhen y Gogarth

Dywedodd Pennaeth Ysgol John Bright, Ann Webb: "Cafodd pob un o'r disgyblion a'r staff eu brawychu o glywed am farwolaeth drasig Dillan ac rydym yn estyn ein cydymdeimlad dwys gyda'i deulu agos ac estynedig ar yr adeg anodd hyn.

"Roedd Dillan yn aelod poblogaidd iawn o gymuned agos Ysgol John Bright ac roedd ganddo natur gynnes, siriol a chariadus iawn.

"Roedd ganddo galon aur ac roedd yn fab, brawd ac ewythr gofalgar a meddylgar dros ben.

"Roedd yn amlwg iawn pa mor bwysig oedd ei deulu i Dillan a chymaint yr oedd yn eu caru.

"Rydym wedi gwneud trefniadau i fod wrth law er mwyn darparu cefnogaeth fugeiliol a chysur ychwanegol i gyd-ddisgyblion Dillan sydd yn naturiol wedi cael sioc a gofid oherwydd yr hyn sydd wedi digwydd."