Dean Ryan yn ymuno â'r Dreigiau fel cyfarwyddwr rygbi

Roedd Dean Ryan wedi bod ag Undeb Rygbi Lloegr ers 2016

Mae Dean Ryan - a fu'n rhan bwysig o dîm Undeb Rygbi Lloegr - wedi cael ei benodi yn gyfarwyddwr rygbi'r Dreigiau.

Fel rhan o'i swydd bydd Ryan, 52, yn gyfrifol am holl faterion rygbi'r rhanbarth ar ac oddi ar y cae.

Mae'n gadael ei swydd fel pennaeth datblygiad chwaraewyr rhyngwladol gydag Undeb Rygbi Lloegr.

Bydd Ryan - sydd wedi hyfforddi clybiau fel Worcester Warriors, Caerloyw a Bryste - hefyd yn cymryd sedd ar fwrdd y Dreigiau.

"Roedd hi wastad am gymryd sialens unigryw i fy nenu'n ôl i amgylchedd clwb," meddai Ryan.

"Rwy'n hynod o gyffrous am yr hyn sydd o'n blaenau."

Cafodd y cyn-brop rhyngwladol, Ceri Jones ei enwi fel prif hyfforddwr dros dro'r Dreigiau ym mis Rhagfyr, ar ôl diswyddo Bernard Jackman.