Cyfrifiad adar yn dangos cynnydd yn nifer y drycin Manaw ar ar Ynys Sgomer

Mae'r cyfrifiad yn amcangyfrif tua 350,000 pâr o ddrycin Manaw

Mae canlyniadau cyfrifiad o un o adar môr pwysicaf Cymru wedi dangos bod eu niferoedd wedi cynyddu 10%.

Mae Ynys Sgomer oddi ar arfordir Sir Benfro yn gartref i thua hanner poblogaeth y byd o adar drycin Manaw yn y gwanwyn a'r haf.

Mae'r cyfrifiad yn amcangyfrif tua 350,000 pâr o'r adar, sy'n bridio mewn tyllau ar yr ynys ac yna'n mudo i Dde America.

Mae Ymddiriedolaeth Bywyd Gwyllt De a Gorllewin Cymru hefyd yn adrodd niferoedd iach o balod, gwylogod a gweilch y penwaig.

Mae Sgomer yn gartref thua hanner poblogaeth y byd o adar drycin Manaw ar adegau

Roedd yr ymchwil yn cynnwys gwyddonwyr o brifysgolion Rhydychen a Chaerloyw a'r Ymddiriedolaeth Genedlaethol, a chafodd ei gynnal ar ynysoedd gerllaw hefyd, fel Ynys Sgogwm.

Yr amcangyfrif yw bod poblogaeth o 349,663 pâr - cynnydd o 10.6% o'i gymharu â'r amcangyfrif o 316,000 yn y cyfrifiad diwethaf yn 2011.

• Traean o adar Cymru dan fygythiad

• Drycin Manaw yn aderyn cenedlaethol Cymru?

• Achub cannoedd o adar drycin Manaw

Mae'r cyfrifiad diweddaraf ar gyfer palod Sgomer - aderyn mwyaf adnabyddus yr ynys - wedi amcangyfrif 24,108 o adar.

Er bod hyn yn ostyngiad bychan ar niferoedd y llynedd, mae'r boblogaeth wedi treblu bron yn y 15 mlynedd ddiwethaf.

Fe wnaeth y cyfrifiad diweddaraf ar gyfer gwylogod (bron i 25,000) a gweilch y penwaig (7,500) ddangos cynnydd o 4% mewn niferoedd.

Mae palod Sgomer yn denu nifer o ymwelwyr i'r ynys

Er hyn mae Ymddiriedolaeth Bywyd Gwyllt De a Gorllewin Cymru yn rhybuddio bod pryderon yn parhau am ostyngiad yn nifer yr adar môr yn fyd eang.

Mae hyn yn cynnwys effaith newid hinsawdd a niferoedd pysgod, ac mae ymchwil yn cael ei wneud hefyd ar effaith plastig mân ar ddrycin.