Trafod symud rhan o lwybr yr arfordir ger Aberystwyth

Llwybr ArfordirCyngor Ceredigion

Mae 'na bryder y gallai rhan o lwybr yr arfordir gael ei golli ger Aberystwyth.

O fewn y 10 mlynedd diwethaf, mae newid hinsawdd a chodiad yn lefel y môr wedi achosi newidiadau ar draeth Tanybwlch, ger Penparcau.

Un posibilrwydd sy'n cael ei drafod gan Gyngor Ceredigion yw symud llwybr yr arfordir.

Mae adolygiad o sefydlogrwydd traeth Tanybwlch yn cael ei gynnal ar hyn o bryd.

Fe gafodd y sesiwn ymgynghori cyntaf ei gynnal dros y penwythnos, gydag uwch ecolegydd Cyngor Ceredigion, Alison Heal, yn casglu ymateb ar faes Sioe Aberystwyth.

"Gyda'r stormydd ni wedi cael dros y 10 mlynedd diwethaf, mae'n edrych fel bod y graean yn symud llawer mwy nag oedd e dros yr 20 mlynedd cyn hynny," meddai.

"Mae'r ddeddfwriaeth o gwmpas y llwybrau yn eithaf cryf. Mae dyletswydd ar y cyngor sir i gynnal a chadw'r llwybrau a'u cadw nhw ar agor."

Ychwanegodd bod y cyngor yn "edrych ar y posibilrwydd o symud llwybr yr arfordir".

"Os ydyn ni'n gallu rhagweld bod rhywbeth yn gallu digwydd, a bo' ni ddim yn 'neud dim amdano fe, mae hynny yn broblem i ni.

"Bosib byddai'n rhaid i ni ei ddatrys ar frys ac mae hynny yn gostus. Os ni'n gallu rhagweld a gwneud rhywbeth o flaen llaw, falle byddai hynny yn rhatach.

Gwylwyr y Glannau

Roedd rhaid addasu rhan o lwybr yr arfordir ym Mhenrhyn Gŵyr ar ôl i greigiau ddisgyn yn ddiweddar

Dyddiadau ymgysylltu:

  • Carnifal Penparcau 29 Mehefin, 13:00 ymlaen;

  • Canolfan Gymunedol Penparcau 6 Gorffennaf, o 13:00 i 16:00;

  • Gorsaf dân Aberystwyth, Trefechan 9 Gorffennaf, o 11:00 i 14:00;

  • Gŵyl Môr i'r Tir 11 Awst.

Does dim bygythiad i gartrefi pobl, dim ond i dir amaethyddol a llwybrau cyhoeddus.

Mae traeth Tanybwlch hefyd yn safle o ddiddordeb gwyddonol arbennig.

Dywedodd y Cynghorydd Rhodri Evans, aelod o Gabinet Ceredigion sydd â chyfrifoldeb dros yr Economi ac Adfywio: "Mae traeth Tanybwlch yn le poblogaidd i lawer o bobl; boed hynny'n ymwelwyr yn cerdded llwybr yr arfordir, preswylwyr yn mynd â'u cŵn am dro bob dydd neu unrhyw un sy'n dymuno mwynhau'r harddwch naturiol y warchodfa.

"Mae'n bwysig bod trigolion lleol a defnyddwyr y traeth yn ymwybodol o'r adolygiad hwn a'r canlyniadau posibl."

Straeon perthnasol