Cwmnïau o Gymru'n 'dangos diddordeb' yn safle Ford

Mae cwmnïau o Gymru wedi dangos diddordeb mewn buddsoddi yn safle ffatri Ford ym Mhen-y-bont, yn ôl Gweinidog yr Economi, Ken Skates.

Mae Mr Skates wedi galw ar y cwmni ceir i roi gwybod os fyddai'r safle yn addas ar gyfer y cwmnïau hyn.

Cyhoeddodd y cwmni wythnos ddiwethaf y bydd y ffatri yn cau ym mis Medi 2020, gyda cholled 1,700 o swyddi.

Yn sgil cau safle Pen-y-bont, mae Mr Skates wedi annog Ford i wneud "buddsoddiad sylweddol" yn y gymuned.

• Ford am gau ffatri Pen-y-bont yn 2020

• Gweithwyr Pen-y-bont 'wedi'u bradychu'

Wrth ymateb i gwestiwn yn y Senedd ddydd Mawrth, dywedodd Mr Skates fod angen i'r cwmni "gydnabod ymrwymiad a ffyddlondeb y bobl".

"Byddwn yn cysylltu â Ford er mwyn gofyn am fuddsoddiad sylweddol yn y gymuned a'r rhai bydd yn cael eu heffeithio."

'Sawl cwmni'

Mae awgrym bod Ineos yn un o'r cwmnïau sydd yn ystyried defnyddio'r safle, ond mae un arbenigwr yn y diwydiant moduro yn rhybuddio na fyddai'r cynnig i greu cerbydau 4x4 ym Mhen-y-bont yn creu digon o swyddi ar gyfer yr holl weithlu.

"Rydyn ni'n gweithio ar sawl posibilrwydd. Mae sawl cwmni rhyngwladol o Gymru wedi cysylltu â ni dros y dyddiau diwethaf i ddatgan eu diddordeb yn y safle," meddai Mr Skates.

"Mae hi'n andros o bwysig nawr bod Ford yn cydweithio â ni er mwyn penderfynu os yw'r safle yn addas ar gyfer y cwmnïau hyn."

Nid oedd awgrym pa gwmnïau oedd wedi cysylltu â'r llywodraeth na chwaith o ba ddiwydiant y daw'r cwmnïau hyn.