Addysgu plant am beryglon cynnau tân bwriadol

Mae tanau gwair, fel hwn ym Metws-y-Coed, yn ymledu llawer cynt mewn tywydd sych

Mae plant yng ngogledd Cymru wedi bod yn cymryd rhan mewn gweithdai theatr sy'n eu haddysgu am ganlyniadau difrifol tanau gwair.

Yn ôl ffigyrau diweddar roedd 75% o gynnydd mewn tanau mynydd yng Nghymru y llynedd - ac roedd 2,850 o'r tanau wedi cael eu cynnau'n fwriadol yn ystod cyfnod o 12 mis.

Dywed trefnwyr y gweithdy fod cynlluniau drama yn llwyddo'n dda i drosglwyddo neges.

Mae drama deithiol prosiect cyfiawnder ieuenctid Theatr Clwyd yn gweithio mewn partneriaeth â Gwasanaeth Tân ac Achub Gogledd Cymru a Heddlu Gogledd Cymru.

Y bwriad yw cyfleu y difrod y mae tân yn gallu ei wneud a siarad yn gyffredinol am droseddu gyda phlant.

Dywed Emyr John sy'n rhan o'r prosiect: "Yn y stori hon mae Ifan wedi bod yn chwarae gyda'i ffrindiau, mae o wedi bod yn creu fideos ar gyfer YouTube ger hen chwarel a drwy greu pranc mae 'na dân wedi cynnau.

"Yn sydyn iawn mae'n mynd allan o reolaeth, ac wedyn mae'r gynulleidfa yn gorfod dod i gasgliad a ydy Ifan yn euog neu'n ddieuog."

Mae'r prosiect yn ymweld â 20 o ysgolion ar draws y gogledd.

'Cael y plant i feddwl o flaen llaw'

Dywedodd y trefnwyr bod rhaglenni addysg fel hyn wedi bod yn effeithiol a'r bwriad yw creu ymwybyddiaeth a lleihau y tanau bwriadol yng Nghymru.

Yn 2015 cafodd plant mor ifanc ag 11 eu harestio wedi cyfres o danau yng nghymoedd y Rhondda, ond y flwyddyn ar ôl hynny roedd y nifer wedi haneru.

Y gred yw bod ymweliad gan yr heddlu a diffoddwyr tân ag ysgolion wedi cyfrannu at y gostyngiad.

Ychwanegodd Emyr John: "'Da ni ddim yn dweud bod pob person ifanc sy'n mynd allan yn cynnau tân. Be 'da ni'n ceisio ei gyfleu yw y gall un sefyllfa arwain at y llall.

"Gall rhywbeth sy'n ymddangos fel pranc i ddechrau fynd allan o reolaeth - be' 'da ni'n geisio ei wneud ydy cael y plant i feddwl o flaen llaw.

"'Da ni'n gobeithio fod y cynhyrchiad yn mynd i gael effaith - os 'da ni'n cael un person ifanc i feddwl cyn gwneud rhywbeth oherwydd ei fod wedi'i ysbrydoli gan ein gweithdy - yna 'da ni wedi llwyddo."