Ymateb cymysg i fathodyn newydd pêl-droed Cymru
- Cyhoeddwyd
Y bathodyn diweddaraf, sy'n rhan o "frand Cymreig, modern", medd CBD Cymru
Mae bathodyn newydd Cymdeithas Bêl-droed Cymru wedi denu beirniadaeth ar ôl i'r geiriau 'Gorau Chwarae Cyd Chwarae' gael eu tynnu oddi arno.
Bydd y geiriau Cymraeg bellach yn ymddangos ar gefn y crys, yn hytrach na fel rhan o'r arfbais.
Mae disgwyl i'r bathodyn newydd ymddangos ar y crysau ym mis Tachwedd pan fydd y gymdeithas yn lansio cit newydd i'r timau cenedlaethol.
Mewn ymateb ar y gwefannau cymdeithasol, mae rhai cefnogwyr yn canmol y ddelwedd newydd, ond yn mynnu y dylai'r geiriau Cymraeg fod yn rhan ohono o hyd.
Ar Twitter, dywedodd y colofnydd pêl-droed a'r blogiwr, Phil Stead ei fod yn ceisio peidio ymateb yn fyrbwyll "...ond mae'n siom colli'r Gorau Chwarae Cyd Chwarae o'r bathodyn".
Llinell amser o fathodynnau tîm pêl-droed Cymru ar hyd y blynyddoedd
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Ar Facebook, fe ofynnodd Raynor Lewis: "Pam ydan ni wedi colli'r motto? Penderfyniad ofnadwy. A pam ydan ni wedi newid ein bathodyn eto p'run bynnag?"
Dywedodd Mark Davies ei fod yn "newid dychrynllyd". "Roedd yr 11 cennin Pedr ar yr [hen] fathodyn yn dangos undod a rŵan maen nhw wedi mynd," meddai.
"Logo wedi'i symleiddio ar gyfer brandio ar y gwefannau cymdeithasol."
Yn siarad o'r Eisteddfod Genedlaethol, dywedodd Owain Young, perchennog stondin ddillad Shwl Di Mwl: "Sai'n gallu gweud bo' fi'n lico fel lot. Ro'n i'n lico'r hen hen un, ac wedyn daethon nhw â'r un newydd [yn 2010] - o'n i ddim yn lico hwnna ar y pryd, ond fi'n lico fe nawr.
"A nawr sai'n lico hwn - felly falle mewn 10 mlynedd byddai'n lico hwn, ond sai'n meddwl 'ny!
"Mae dyn yn lico dangos y bathodyn pan mae'n cerdded ambyti'r lle, yn dweud 'Gorau Chwarae Cyd Chwarae' - mae'n galondid, ond dyw e ddim rhagor."
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Ond mae rhai yn hoffi'r dyluniad newydd.
Dywedodd Owain Bright: "Yr ail newid mewn saith mlynedd, mae'n ymddangos yn hollol ddibwrpas. Wedi dweud hynny, dwi'n eitha hoff ohono."
Tra bod Gwyn Williams yn credu bod gan eu cyfoedion yn y byd rygbi rhywbeth i'w ddysgu: "WRU cymerwch sylw. Arwydd Cymreig go iawn. Diolch."
Bydd 'Gorau Chwarae Cyd Chwarae' a chennin Pedr yn cael eu pwytho o dan goler y crys cenedlaethol
Dywedodd llefarydd ar ran CBD Cymru: "Gyda chyfrifoldebau yn amrywio o'r timau cenedlaethol i'r gêm ddomestig, llywodraethant i ddatblygiad pêl-droed - mae pob un rhan yn bwysig.
"Dyma pam fod brand wedi cael ei ddatblygu sy'n adlewyrchu a dathlu hyn, gan ddarparu system unedig i'w ddefnyddio ledled CBDC sydd hefyd yn rhoi hunaniaeth i bob un adran - un brand Cymreig, modern.
"Yn y broses o ailddatblygu ein bathodyn, mae rhai elfennau pwysig wedi cael eu helaethu mewn mannau eraill.
"Bydd arwyddair y timau cenedlaethol, 'Gorau Chwarae Cyd Chwarae' nawr yn cael ei bwytho o dan goler y crys cenedlaethol.
"Yno bydd y cennin pedr hefyd, gan ategu at y neges - mewn undod mae nerth."