Car yn mynd oddi ar glogwyn i'r môr yn Y Mwmbwls
- Cyhoeddwyd
Cafodd criw bad achub eu galw allan wedi i gar fynd oddi ar y ffordd ac i'r môr yn ardal Y Mwmbwls ger Abertawe.
Daeth galwad i'r gwasanaethau brys ychydig cyn 06:00 fore Mawrth.
Roedd cerbyd wedi mynd dros glogwyn ym Mae Limeslade.
Cadarnhaodd Heddlu'r De bod menyw 37 oed wedi'i chynorthwyo o'r môr.
Cafodd ei chadw o dan y Ddeddf Iechyd Meddwl a'i chludo i Ysbyty Treforys.
Dywedodd Richie Webborn o griw'r bad achub: "Doedd dim llawer o arwyddion i'n galluogi ni i adnabod lleoliad y ddamwain heblaw ychydig o falurion oedd yn arwain at lwybr ar waelod y clogwyn islaw parlwr hufen iâ Forte's."
