Garddwr wedi marw ar ôl cael ei bigo gan gacynen

Mae cwest wedi clywed sut y bu farw garddwr ar ôl cael ei bigo gan gacynen yn Sir Ddinbych.

Fe wnaeth Ian Flack, 76 oed o ardal Rhuthun, ymateb yn wael i gael ei bigo wrth arddio yn Llanbedr Dyffryn Clwyd ar 24 Hydref y llynedd.

Roedd wedi dweud wrth berchennog y tŷ lle'r oedd yn garddio ei fod wedi cael ei bigo ac nad oedd yn teimlo'n dda, cyn syrthio i'r llawr yn fuan wedyn.

Er gwaethaf ymdrechion i'w adfywio - gan gynnwys defnyddio diffibriliwr a chymorth parafeddygon - bu farw.

Daeth archwiliad post-mortem i'r casgliad fod Mr Flack, a oedd yn wreiddiol o Sir Gaerhirfryn, wedi marw o anaffylacsis.

Daeth Dirprwy Grwner Gogledd Cymru, Joanne Less, i'r casgliad fod marwolaeth Mr Flack yn ddamweiniol, a'i bod hi'n bosib iddo gael ei bigo fwy nag unwaith.

Clywodd y cwest hefyd bod partner Mr Flack o 45 mlynedd wedi marw o achosion naturiol pedwar diwrnod yn unig wedi ei farwolaeth.