Gwrthdrawiad A55: Beiciwr modur wedi'i anafu'n ddifrifol

Mae'r heddlu wedi cadarnhau fod beiciwr modur wedi cael ei anafu'n ddifrifol mewn gwrthdrawiad yn Ynys Môn brynhawn Llun.

Cafodd y gwasanaethau brys eu galw i'r digwyddiad ar yr A55 rhwng Llanfairpwll a Gaerwen ychydig cyn 14:30.

Roedd y ffordd ar gau i'r ddau gyfeiriad am rai oriau a chafodd yr unigolyn ei gludo i'r ysbyty gan yr Ambiwlans Awyr.

Dywedodd Heddlu Gogledd Cymru eu bod nhw bellach yn ymchwilio i'r modd yr oedd dau feiciwr modur yn gyrru cyn y gwrthdrawiad.

Mae'r llu wedi gofyn i unrhyw un sydd â gwybodaeth am y digwyddiad i gysylltu â nhw drwy ffonio 101.