Cyrchoedd yr heddlu yn targedu gangiau cyffuriau

Cafodd cyrchoedd ar y cyd eu cynnal fore Iau

Mae Heddlu Gogledd Cymru, ynghyd â heddluoedd yn Yr Alban a Glannau Mersi, wedi cynnal nifer o gyrchoedd ben bore gan dargedu gangiau cyffuriau llinellau sirol (county lines).

Prif bwrpas y cyrchoedd oedd ceisio dod o hyd i gyflenwadau anghyfreithlon o gocên a heroin.

Cafodd archwiliadau ar eiddo eu cynnal am 07:15 fore Iau yn Sir y Fflint, Sir Conwy ac Ynys Môn.

Dywedodd llefarydd ar ran Heddlu'r Gogledd fod dros 300 o swyddogion o dri llu gwahanol wedi cymryd rhan yn y cyrchoedd.

• Cyhuddo dau o fewnforio 750kg o gocên

Yn gynharach eleni, fe wnaeth yr Asiantaeth Troseddu Cenedlaethol amcangyfrif fod yna 100 o linellau sirol - gangiau sy'n ceisio ehangu o'r dinasoedd i drefi ac ardaloedd gwledig - yn weithredol yng Nghymru.

"Bydd dosbarthu cyffuriau anghyfreithlon ddim yn cael ei ddioddef a byddwn yn cymryd camau cadarn i'w rhwystro," meddai'r Uwch Arolygydd Mark Pierce o Heddlu'r Gogledd.

"Ond nid ydym yn gallu gwneud hyn ar ben ein hunain, a'r allwedd bwysig i'n helpu yw gwybodaeth."