Glaw trwm yn cau ffyrdd a rheilffyrdd

Bu'n rhaid i ddyn gael ei achub o'i gar yn Aberdâr ar ôl cael ei ddal mewn llif o dan bont rheilffordd

Mae glaw trwm yn achosi trafferthion ar ffyrdd a rheilffyrdd yn y de wrth i'r Swyddfa Dywydd ddweud bod rhybudd melyn mewn grym nes 23:00 nos Fawrth.

Mae'r rhybudd mewn grym rhwng 4:00 a 23:00 mewn siroedd ar draws de Cymru, Powys a Wrecsam, ac mae'r Swyddfa Dywydd yn rhagweld y gallai'r glaw achosi trafferthion oherwydd llifogydd mewn mannau.

Mae disgwyl hyd at 30mm (1.2 modfedd) o law i syrthio yn y mwyafrif o lefydd, gyda'r posibilrwydd y gallai hyd at 70mm (2.8 modfedd) o law syrthio mewn ambell fan hefyd.

Mae sawl rhybudd mewn grym ar afonydd ledled Cymru yn dilyn y glaw trwm.

Fore Mawrth fe rybuddiodd Heddlu'r De fod angen i yrwyr fod yn ofalus am fod amodau gyrru'n anodd mewn rhannau.

Yn ôl y Swyddfa Dywydd mae posibilrwydd hefyd y bydd cyflenwadau trydan ac adnoddau eraill i gartrefi a busnesau yn cael eu colli.

Aeth y car hwn i drafferth rhwng Ewenni a ffordd yr A48 ger Merthyr Mawr fore Mawrth

Roedd yr A4107 ar gau i'r ddau gyfeiriad rhwng Abergwynfi a'r A4061 Ffordd Bwlch-y-Clawdd (Cwmparc) yn dilyn tirlithriad yno.

Fe gyhoeddodd Trafnidiaeth Cymru hefyd na fydd trenau'n rhedeg rhwng Aberpennar ac Aberdâr am fod llifogydd wedi effeithio ar y llinellau.

Mewn mannau fe allai'r llifogydd beri perygl i fywyd, ac fe allai rhai cymunedau gael eu hynysu gan fod disgwyl i ffyrdd gael eu cau gan ddŵr.

Roedd yr A4107 ger Abergwynfi ar gau am beth amser yn dilyn tirlithriad

Rhybudd llifogydd

Mae Cyfoeth Naturiol Cymru yn rhybuddio bod llifogydd yn bosib mewn sawl ardal yn dilyn y glaw trwm. Mae'r rhybudd 'byddwch yn barod' yn berthnasol i:

• Ardaloedd o gwmpas yr afon Glaslyn ac afon Dwyryd, o Dyffyn Ardudwy i Nant Gwynant;

• Afonydd dalgylch Nedd;

• Afonydd dalgylchoedd Ewenni a gorllewin Bro Morgannwg;

• Afon Elai yn Sain Ffagan, Glanelai a Phont Elai;

• Afonydd dalgylchoedd Llynfi ac Ogwr.