Dau ddyn yn pledio'n euog i fewnforio 750kg o gocên

Scott Kilgour (L) a Gary Swift (R)NCA

Cafodd Scott Kilgour (chwith) a Gary Swift (dde) eu harestio ar y cwch tua milltir oddi ar arfordir Abergwaun

Mae dau ddyn wedi pledio'n euog i gyhuddiad o fewnforio cocên yn dilyn un o'r darganfyddiadau mwyaf o'i fath mewn hanes ar foroedd y DU.

Fe wnaeth yr Asiantaeth Droseddau Cenedlaethol (NCA) ddarganfod 751kg o'r cyffur ar gwch hwylio - yr SY Atrevido- ger Abergwaun, Sir Benfro.

Mewn cyrch oedd wedi'i threfnu, fe gafodd y cwch llawn cyffuriau ei stopio gan HMS Protector gyda swyddogion o'r NCA ar ei bwrdd.

Fe gafodd Gary Swift, 53, a Scott Kilgour, 41, y ddau o Lerpwl, eu harestio ar fwrdd y cwch a oedd wedi hwylio o Suriname, De America.

NCA

Roedd y cocên â phurdeb hyd at 83%, yn ôl yr NCA.

Yn Llys y Goron Abertawe ddydd Gwener, fe wnaeth y ddau gyfaddef mewnforio'r cyffur.

Mae'r NCA wedi amcangyfrif bod gwerth y cyffuriau ar y stryd yn £60m, y cyfanswm mwyaf sydd erioed wedi'i feddiannu gan yr awdurdodau ar foroedd y DU.

Bydd y ddau ddyn yn cael eu dedfrydu ar 28 Rhagfyr.

Straeon perthnasol