Diweddaru rhybuddion am fwy o law trwm yng Nghymru

Roedd lefel Afon Tywi yng Nghaerfyrddin yn uchel fore Llun

Mae'r Swyddfa Dywydd wedi diweddaru rhybuddion tywydd am Gymru dros yr oriau nesaf.

Roedd glaw trwm eisoes wedi achosi trafferthion ar draws y de a'r canolbarth ddydd Sul, ac mae rhybudd arall am law trwm wedi dod i rym brynhawn Llun.

Yn wreiddiol, roedd y rhybudd melyn yma mewn grym o 15:00 ddydd Llun tan brynhawn Mawrth.

Bellach mae'r rhybudd cyntaf yn rhedeg o 15:00 tan hanner nos ddydd Llun, ond yna mae rhybudd melyn arall yn dod i rym am 06:00 ddydd Mawrth ac yn weithredol tan 20:00 dydd Mawrth.

Yn hytrach na de ddwyrain Cymru yn unig, mae'r rhybudd melyn yn weithredol ar draws de Cymru i gyd.

Yn dilyn llifogydd nos Sul, mae lefel Afon Tywi yng Nghaerfyrddin yn parhau yn uchel.

Mae Cyngor Sir Gâr yn dweud bod perygl o lifogydd yn Llangennech, Cydweli, Pentywyn a Llansteffan.

Yn Abergwili mae ymgais i achub tua 20 o wartheg o lifogydd wedi eu hatal am y noson. Roedd ymgais y gwasanaethau brys a'r ffermwr i'w hannog i ddiogelwch yn aflwyddiannus.

Ym Mhowys mae'r A490 ar gau ger Pentre'r Beirdd oherwydd tirlithriad yno wedi'r glaw.

Tirlithriad ger Pentre'r Beirdd ym Mhowys

Ar draws de Cymru mae 14 rhybudd coch am lifogydd mewn grym, a dros 20 o rybuddion oren i baratoi am lifogydd.

Mae manylion llawn y rhybuddion yma ar dudalen arbennig ar wefan Cyfoeth Naturiol Cymru.