Tri dyn dan ymchwiliad wedi i gar 'yrru at bobl' ar brom

Mae tri dyn wedi cael eu harestio a'u rhyddhau dan ymchwiliad ar ôl iddi ymddangos fod car wedi'i yrru tuag at bobl yn Aberystwyth.

Dywedodd y gwasanaeth ambiwlans eu bod wedi cael eu galw i Marine Terrace yn Aberystwyth toc cyn 05:00 ddydd Sadwrn.

Ychwanegodd Heddlu Dyfed Powys eu bod wedi cael eu galw i'r ardal yn dilyn adroddiad bod car yn gyrru'n beryglus, a'i fod wedi taro cerddwyr neu biler ar y prom.

Mewn fideo gafodd ei rannu ar y cyfryngau cymdeithasol, mae car yn cael ei weld yn gyrru ar gyflymder ar hyd y promenâd cyn i ffrwgwd ddigwydd.

Cafodd un dyn ei drin am fân anafiadau, ond fe wrthododd dyn arall gael triniaeth feddygol.

Cafodd tri dyn eu harestio ar amheuaeth o ymosod ac o droseddau gyrru, ac maen nhw bellach wedi'u rhyddhau dan ymchwiliad.

Dywedodd yr heddlu eu bod yn apelio ar unrhyw un sydd â mwy o wybodaeth i gysylltu â nhw.