Camerâu cyflymder ffyrdd Triongl Evo dal ddim yn weithredol

Mae tair lôn rhwng Pentrefoelas, Llyn Brenig a Cherrigydrudion yn cael eu hadnabod fel Trongl Evo

Dydy camerâu cyflymder ar ffordd sy'n nodedig am yrru peryglus dal ddim yn weithredol, chwe mis ar ôl iddyn nhw gael eu gosod.

Cafodd y camerâu eu gosod ym mis Ebrill yn y gobaith y byddai'n atal gyrwyr rhag defnyddio ffyrdd Triongl Evo fel trac rasio.

Gosodwyd y camerâu ar yr A453 gan gynghorau Conwy a Sir Ddinbych, gyda help grant o £500,000 gan Lywodraeth Cymru.

Mae tair lôn rhwng Pentrefoelas, Llyn Brenig a Cherrigydrudion yn cael eu hadnabod yn lleol fel Triongl Evo.

Bu farw pedwar o bobl ar y ffyrdd rhwng 2012 a mis Ebrill eleni.

Mewn datganiad ar ran y cynghorau a Heddlu Gogledd Cymru, dywedodd GanBwyll - partneriaeth lleihau damweiniau ffyrdd Cymru: "Mae cynllun Camera Cyflymder Cyfartalog yr A543 yn fenter amlasiantaethol i fynd i'r afael â nifer o wrthdrawiadau ar y ffordd.

"Er ein bod yn deall yn iawn fod harddwch naturiol y rhan hon o'r byd yn atyniad, rydym am sicrhau bod modurwyr yn teithio ar ein ffyrdd yn ddiogel drwy leihau eu cyflymderau, cadw at arwyddion rhybuddio a gwybodaeth sydd wedi'u lleoli ar hyd y ffyrdd ac ystyried diogelwch defnyddwyr eraill y ffordd.

"Mae sawl cam i gomisiynu cynllun o'r fath ac ar hyn o bryd rydym yn aros i'r camerâu terfynol gael eu comisiynu i gwblhau'r cynllun yn llawn.

"Rydym eisoes wedi cael adborth cadarnhaol gan gymunedau sydd wedi gweld gostyngiad mewn cyflymderau."

Dywedodd GanBwyll y byddai gwaith i osod mwy o gamerâu - ar y B4501 - yn cychwyn yn 2020.