Allen Clarke: Y Gweilch yn cadarnhau ei ymadawiad

Fe lofnododd Allen Clarke gytundeb tair blynedd yn Ebrill 2018 i fod yn Brif Hyfforddwr ar y Gweilch

Fe gadarnhaodd y Gweilch fod y prif hyfforddwr, Allen Clarke, wedi gadael y rhanbarth.

Nid yw Clarke wedi bod yn gyfrifol am y tîm cyntaf ers diwedd mis Tachwedd ond roedd y Gweilch dal yn ei gyflog tan nawr.

Mewn datganiad byr fe gadarnhaodd y rhanbarth fod Clarke, 52, wedi gadael ac fe ddiolchon nhw fe "am ei holl ymdrechion a'i gyfraniad".

"Gall y Gweilch gyhoeddi eu bod wedi dod i gytundeb cyfreithiol gyda'r prif hyfforddwr Allen Clarke, ac fe fydd yn gadael ar unwaith," meddai'r datganiad.

Fe ymunodd Clarke â'r rhanbarth fel hyfforddwr y blaenwyr yn haf 2017 a daeth yn brif hyfforddwr dros dro ym mis Ionawr 2018 yn dilyn ymadawiad y pennaeth blaenorol Steve Tandy.

• Mwy o straeon am Y Gweilch

Ym mis Ebrill 2018 fe lofnododd gytundeb tair blynedd fel prif hyfforddwr y Gweilch.

Mae rhanbarth Cymru wedi cael trafferth y tymor hwn, gan ennill dim ond un gêm Pro14 o dan Clarke.

Mae cadeirydd y Gweilch, Rob Davies, wedi dweud o'r blaen "nad canlyniadau'n unig" oedd yn gyfrifol am y sefyllfa ond bod "mater o ymddygiad personol" hefyd.

Mae hyfforddwyr cynorthwyol Matt Sherratt - a fydd yn gadael Stadiwm Liberty ar ddiwedd y tymor - a Carl Hogg wedi mynd i'r afael â'r tîm cyntaf, tra bod cyn hyfforddwr Cymru, Mike Ruddock, wedi bod yn ymgynghori dros dro hefyd.